قبلة يهوذا - بقلم لقمان ديركي

[نبيذومطر]

رد: قبلة يهوذا ....... بقلم لقمان ديركي

ههههههههههههههههههههههههههههههههههههههههههههههه راااااااااااااااااااااااااااااااااااااااااائعة قولة أبو ريمون لهلق بعدني عم اضحك عليه

[saso]

رد: قبلة يهوذا ....... بقلم لقمان ديركي

حلوة ابو جادو
كلك جديد بجديد
بس لهلق بعدني عم اضحك عليه

[فادي حداد]

رد: قبلة يهوذا ....... بقلم لقمان ديركي

بما أنو الحكي عن لقمان اللي بعشقو اسمحولي احيي الموضوع من عندي هالمرة بنقل لاحدى كتاباتو:
لقمان ديركي : وحيداً في المنزل
المصدر : لقمان ديركي
03/10/2008
يحدث أن يأتي العيد وأنت تنتظر الحرية، تنتظر أن يمضي أهلك إلى مسقط الرأس،
إلى البلدة البعيدة، فتقول في نفسك إنك ستتذرع وتتحجج كي تبقى في المنزل
وحيداً، لا .. لن تذهب معهم ولو على جثتك، وتصر على المكوث في المنزل وحيداً،
وبالطبع ستقول بأنك ستستغل فترة العيد كي تدرس، وسيكون جيداً جداً أن لا ضجة
في المنزل، ولا أصوات، ولا إخوة ولا أخوات، ولا أم ولا أب، لكن أمك لن تقتنع،
وستصر على ذهابك معهم ولو على جثتها أيضاً، وستتكرر كلمة الجثة كثيراً عند
طرحك لموضوع بقائك وحيداً في المنزل، وسيحاول والدك أن يقنعك بالذهاب إلى
البلدة والدراسة هناك، لكنك ستجعر بعدة براهين وإثباتات على أن الدراسة في
البلدة غير ممكنة، لأنو ابن خالتك لن يتركك وشأنكن كما أن ابن عمك العاطل عن
العمل سيدبقك، بالإضافة إلى شلة الطرنيب والتريكس من أقاربك التي ستسهرك حتى
الصباح على أكل الختيار، وبلع الأربع بنات، وطرنب بالغش، وغمز شريكه، فتلين
والدتك قليلاً، وتفكر أن الولد معه حق والله ولكنها لن تستسلم، وستغريك
بالبلدة عندما تذكر بنات خالك الجميلات، وبنت عمك الأمورة، فيبتسم الوالد وهو
يراك تفكر في هذه اللحظات، ويحس الجميع أنك ذاهب معهم لا محالة، خاصة عندما
يلمحون لمعان المعاني في عيونك، لكنك ستتذكر أن بنات الخال وبنت العم ما لهم
بسيرة الحب إلا في حال انتهائه بالزواج، وأنت فين والزواج فين، لساتك شلوف
منتوف مالك حيلة ولا فتيلة بأمور الاستقرار إلا لبعد عشر سنوات تكون قد تخرجت
فيها من الجامعة وخدمت العسكرية واشتغلت شي خمس سنين ويفضل أن تكون هذه الخمس
سنين الأخيرة في الخليج حيث الدراهم والريالات والدنانير، وتصرخ فجأة أنك
ستبقى ستبقى ستبقى وستدرس وتدرس وتدرس، ويوافقون على بقائك بعد أن تقرر أمك
أن تترك لك كل الجلي كي تتسلى به في أوقات فراغك، ويترك لك الإخوة كل الغرف
بفوضاها كي تتسلى بترتيبها في العيد، ويوصيك الوالد بأن لا تدخل أحداً إلى
البيت وخاصة رفاق السوء، وتنبهك الوالدة بأنك مراقب من قبل الجيران ويا ويلك
إذا ما أدخلت البنات الفلتانات إلى البيت، وتحلف وتقسم وتؤكد وتوقِّع على
الوثيقة، وتنفرد بالبيت، تتصل بأصدقائك كي يزوروك لكن لا أحد، الكل مضى إلى
البلدة، والذي لم يمض مو فاضي لأنو عم يزور الأقارب، تتصل بصديقاتك كي تأتي
شي وحدة منهن وتدرس معك، لكن ولا وحدة وافقت، لأنهن ذكيات ويعرفن أنو أهلك
مسافرين، تنزل إلى الشارع عسى ولعل تصادف شي حدا لكن لا أحد سوى الأولاد وهم
يلعبون على المراجيح ويطلقون النار على بعضهم البعض من المسدسات، تدخل إلى
مركز المدينة فتجده خاوياً خالياً إلا من المراهقين من جماعة سينما العيد،
تجلس في المنزل، تتسلى بترتيب الغرف كلها، تتسلى بالجليات، ثم تشطف المنزل
كتبرع منك، تتفرج على التلفزيون فتمل، لأنو كل المسلسلات خلصت، تحاول النوم
فلا يأتيك النوم، تمضي في الصباح الماكر إلى الكراج وتصعد في الباص الحبيب،
وبوجهك إلى البلدة، إلى بنات الخال والخالات والأعمام، وإلى التريكس والطرنيب
والمتة، ويفرح بك الأقرباء بعد أن زعلوا لأنك بقيت في المدينة، وينظر إليك
الوالد متهكماً، والإخوة والأخوات شامتين شامتات، وتنظر أمك إليك بحنان.

[AboJado]

رد: قبلة يهوذا ....... بقلم لقمان ديركي

لقمان ديركي:رسالة من تحت الدلف
المصدر : لقمان ديركي
26/02/2009


المهم أنو الدلف صار للركب يا معلم والمازوت خلص، وصديقي بياع المازوت ما عم بيرد، والشركة ما عم تلقطه لتبع الهوندا الصغيرة على اعتبار أن طلبي صغير لا يستحقّ قدوم الشاحنات الكبيرة إلى شوارع عين كرش اللي مالك محل دولاب لتحط سيارتك فيها، ونزلنا يا معلم عَ الشارع نزلة الثوار، وشاهدنا شاحنة مازوت بعد انتظار لكن لاصفّة للشاحنة قرب الدار، فتبادلنا أرقام الموبايلات وأنخاب المازوت،

وتعاهدنا على اللقاء بعد أن ألاقي صفّة للسيارة قرب الدار، وبدأنا المشوار، وطلّيت من الشبّاك، وعددتُ لحظات الانتظار كلّ لحظة بلحظتها، إلى أن تزحزحت سيارة من مكانها فاتصلتُ ببياع المازوت عبر خدمة الخبر العاجل أنو عندي صفّة، لكنه قال أنو بدُّه تلات ارباع الساعة ليوصل لأنو بعيد، فجمعت عدة سحارات من عند أبو محمد الخضري وحجزت بها المكان الخالي، وعرفت كل الحارة أنني بانتظار بياع المازوت فتمَّ إبلاغ كل السيارات القادمة عن الحالة الطارئة ورن الموبايل، رنا من الجريدة بدها الزاوية اللي قريتوها مبارح تبع الأطفال المشردين اللي ما كان يلتقالهم حل غير سفقهم بالكفوف قدام الرايح والجاي، أنزلنا اللاب توب لتحت، بس اللاب توب تبعنا متلنا ما بيشتغل عالبطارية، مدلل.. بده كهربا، قام وصلنا الكهربا من محل الخضري، وعبَر سلك اللاب توب حقول البقدونس وسهول الخس وأدغال الخيار وأحراش الفقوس وبيارات البرتقال وبساتين الكرز اللذيذ حتى وصل للإبريز، وكتبنا الزاوية ونحن جالسون على الرصيف، بينما جاري يقول للمارة: اتركوه عم ينتظر بياع المازوت، وبعتنا الأولاد ليبعتوا الزاوية لرنا بالأنترنيت، واتصلنا ببياع المازوت فما رد، فأرسلنا له عبر الإس إم إس: كذب بعض بياعي المازوت ولو صدقوا!! وجاء.

[AboJado]

رد: قبلة يهوذا ....... بقلم لقمان ديركي

لقمان ديركي :نظرة إلى سواكِ
المصدر : لقمان ديركي
16/03/2009

في شي كبير كتير.. متل حمار عم يمشي بشارع ضيّق، وهلأ أنا حاسس أنو لازم أعمل شي، يعني متل أنو أكرهِك، بس ما عم أقدر أعمل شي، وأنت مفكرة حالك قوية وبتعرفي شو بدك، وأنا ما بيموتني غير اللي بيعرفوا شو بدهم..


شو بدك؟! كنت مفكر حالي عم ألعب، وبعدين صرت راكض ورا شي ما بعرفه، وكمان عم افكر ـ مع أني ما بطيقك وأنتِ وعم بتفكري ـ عم افكّر أرفس كل شي، يعني نحنا كم مرة بنعيش؟!..

وبتعرفي ليش بنعيش؟!..
مشان نكسر حالنا.. لأنو ما بيصير نكسر الناس اللي حوالينا..

بنفكر بغيرنا وبندمر حالنا
أنا ما إلي بلد ومالي أخ.. يعني وحيد.. اللي ما أله حدا..

وأنا ما إلي غير روحي اللي بتعلقني بشخص مع أني بحسه دايماً أنو مو إلي، وهو من قد مو حمار كمان بيحس حاله مو لألي.

عم أتطلع على بنت هون وعم تتطلع فيّ
عم افكر أديشها سخيفة وأديشني سخيف
ليش مين في غيرِكْ أقدر أتطلع فيه طول عمري بدون ما أشبع، وأنتِ...


أنتِ خايفة أني أشبع..

[Molham Haddad]

رد: قبلة يهوذا ....... بقلم لقمان ديركي

يا رجل عندو كتير كتابات لذيذة بس هي ناااااااااااااااااااااار

حبيبي أبو جادو

سلام المسيح يكون معك

[AboJado]

رد: قبلة يهوذا ....... بقلم لقمان ديركي

أهلا ملهم نورت

[maisoo]

رد: قبلة يهوذا ....... بقلم لقمان ديركي

كتير حلو
بس بدنا كمان
الله يعطيك العافية

[lilyaroma]

رد: قبلة يهوذا - بقلم لقمان ديركي

المقالة الأولى أول مرة بقراه و لاقيتها كتير حلوة ومهضمومة متلك


مشكور يا غالي

[anas.]

رد: قبلة يهوذا - بقلم لقمان ديركي

عنجد مميييييييز

مشششششششكور كتييير

[روري]

رد: قبلة يهوذا - بقلم لقمان ديركي

كتير حلوين مع إني ما بقرالو بالعادة بس مالي عرفانة أنو هيك كتاباتو حلوين
مرسي إلك

[AboJado]

رد: قبلة يهوذا - بقلم لقمان ديركي

هلااا
ميسو ليلي انس روري
نورتوا والله
وانشالله بحط كمان كتابات
بس عم حاول اختار شوي
ميرسي كتير للردود
هلااا بالكل والله

[AboJado]

رد: قبلة يهوذا - بقلم لقمان ديركي

لقمان ديركي :أنثى جميلة
المصدر : لقمان ديركي
27/03/2009


الأنثى الجميلة حالة خاصة، ربما هي الجنس الثالث الذي لطالما كان الموضوع المفضَّل للفن والأدب وما لفَّ لفّهما من الغواية والصبابة يا روح، فالفتاة الجميلة وضعها مختلف، لا يشبه وضع باقي الفتيات بأيِّ شكل من الأشكال، فهي المفضَّلة والمدلَّلة والتلميذة التي تجلسها المعلمة في الصف الأول حتى لو كانت أكسل شي، وأقول المعلمة لأنَّ المرأة الجميلة تلقى التقدير حتى من النساء،

لكنها تلقى الغيرة أيضاً وتلقى الحسد من الفتيات الطموحات بدخول نادي الجمال وأوراقهن الثبوتية في وجوههن وقوامهن، لكنك ستقول إنها مضطهدة شأنها شأن باقي النساء في مجتمعاتنا العجيبة فأقول لا، لا .. المرأة الجميلة غير مضطهدة، بالعكس مدلَّلة، ويمكن في بلادنا أن تأخذ امرأة جميلة حتى لو كانت غبية مكان أفهم رجل أنجبته البلاد، كما أنَّ المرأة الجميلة يمكنها في جلسة أن تسرق الأنظار من نجوم الفن وكرة القدم والمال، ولِمَ لا، فهي المستهدفة دقُّوا عالخشب، وعليها الأنظار أللهم لا حسد وشوكة بعيون الأوغاد، من طلعتها الصبح وحتى عودتها في المساء، في المكتب بيوصل لها الشاي قبل ما تقول للأوفيس بوي هاي، وفي غرفة المدير هي الوحيدة التي تجلس باسترخاء بينما التوتر يلعب في أنحاء كيان المدير العام، لذا فإنك من النادر أن تراها في جمعيات الدفاع عن حقوق المرأة، ذلك أنَّ الأمر لا يعنيها، وكلمة اضطهاد ليست من قاموسها، يجذبونها بقوة الشخصية وقوة الإمكانية، يرقصون أمامها، يبدعون في حضرتها، تراهم قبل قدومها جالسين كالنيام، ومن فوتتها بتهب هالأجسام، وبتشتغل الرؤوس، وبتدق القلوب، وبيبلش السباق؛ سباق الحصول على قلب المدام، على إعجاب المدموزيل، على نظرة، على لفتة، على كلمة موجَّهة إليك بالتحديد.. المرأة الجميلة جنس ثالث، تحفة من تحف الخالق الجبار، فخذ الإلهام.

[jida]

رد: قبلة يهوذا - بقلم لقمان ديركي

لقمان ديركي :أنثى جميلة

حكيو واقعي كتير

اول مرة بقرالو ..

ميرسي ابو جادو حلوين حبيتون

[anas.]

رد: قبلة يهوذا - بقلم لقمان ديركي

حلوة كتير هاي القصة
وبجد الأنثى الجميلة هي الجنس الثالث عند البشر
وشو ما بدها بيحضرلا
مشششكور ابو جادو
وناطرين الكفاي

[AboJado]

رد: قبلة يهوذا - بقلم لقمان ديركي

لقمان ديركي : كلمة وبتنقال
المصدر : لقمان ديركي
02/04/2009


ـ كيفِكْ؟!
ـ مشتاقة.
ـ مشتاقة!!!
ـ إي.. في مشكلة؟!
.

ـ لأ.. بس ..قصدي .. إي في مشكلة.
ـ شو المشكلة؟!
ـ أنِّكْ مشتاقة.
ـ وين المشكلة؟!
ـ بالعكس ما في مشكلة.. أنا كتير مبسوط أنِّك مشتاقة لألي.
ـ إي الحمد لله.. الله يسعدَك يا أمير.
ـ أمير!!.. أنتِ بتعرفي شو عم تحكي؟!
ـ بعرف حبيبي بعرف.
ـ حبيبي!!.. ولي!! فيني شوفك هلأ؟!
ـ والله يا روحي ما فيني هلأ.
ـ روحي!!.. إيمتى فيكِ له كان؟! بعد الظهر؟!
ـ ولا بعد الظهر ما فيني شوفك، ما عندي وقت بنوب.
ـ بس من شوي قلتِ لي أنِّك مشتاقة لألي والمشتاق بيشوف التاني بأسرع وقت.. مو هيك؟!
ـ مظبوط.. بس أنا ما بعرف شو بدي قلَّك.. مشتاقة فعلاً بس مو لهالدرجة اللي أترك فيها كل شي من إيدي وأنزل لأشوفك.
ـ آه.. يعني مو كتير مشتاقة؟!
ـ مو للدرجة اللي ببالك.
ـ وحبيبي.. أنتِ قلتِ لي حبيبي إذا ما كنت غلطان؟!
ـ عفواً يمكن أنت فهمتني غلط.. قلتها عادي.. كلمة وبتنقال.
ـ كلمة وبتنقال؟! متل روحي ويا أمير والله يسعدك؟!
ـ ....طبعاً حبيبي.. مجرد كلمات ما إلها معنى.
ـ إيوه.., آسف لا تواخذيني يا أختي.
ـ هه ليكك قلتها بعضمة لسانك.
ـ شو هي؟!
ـ أختي.. أنا فعلاً متل أختك.
ـ لأ يا أختي مو قصدي.. بس كلمة وبتنقال

[Molham Haddad]

رد: قبلة يهوذا - بقلم لقمان ديركي

ههه

[AboJado]

رد: قبلة يهوذا - بقلم لقمان ديركي

هلاا ملهم

[hboob]

رد: قبلة يهوذا - بقلم لقمان ديركي

كثيررر حلوين
يسلمن ابو جادو
عم نستني بعد عجبوني

[AboJado]

رد: قبلة يهوذا - بقلم لقمان ديركي

هلا هبوب