عجبك عجبك .... ما عجبك .... !!!!

[tiger]

فأنت تولد و بالرغم من صيحاتك و بكائك تُضرب على قفاك و تسلم لوالديه كما لو أن الكل يقول لك: عجبك عجبك ما عجبك دق راسك بالحيط ما فينا نرجعك...

تبدأ بالتأقلم و تعتاد على العالم الجديد و حليب أمك فتبدأ أسنانك بالظهور و تبدأ والدتك بإطعامك الطعام المهروس الغير شهي و لسان حالها يقول: عجبك عجبك ما عجبك ما فيك تضل عم ترضع طول عمرك و لا فيني طعميك أكل عادي و ما في بتمك سنان..



مرحلة أخرى تبدأ فيها بالسير ثم يحين وقت تعلمك استخدام المرحاض (العفو من القارئين و السامعين) فيذوق كلاً منكما أي أنت و والدتك الأمرين و لسان حال الوالدة يقول: عجبك عجبك ما عجبك ما فيك تضل تعملها تحتك طول عمرك..



تدخل المدرسة و عجبك عجبك ما عجبك ما في حل تاني لأن ما في شي تاني تقدر تعملو بهالعمر غير الروحة على المدرسة..



تكبر و تصبح مواطناً شاباً أو فتاةً و بعد عمر طويل تحصل على الباكالوريا إن حصلت عليها و هنا لدينا حالتان:

الأولى أن تكون مواطن / طالب كسلان فتترك الدراسة و تذهب إلى الجيش أو تمارس عملاً حراً إن كنت شابا،ً أما إن كنت فتاةً فتجلسين في بيتك بانتظار عريس الهنا و عجبك عجبك ما عجبك ما في قدامك غير هالحل..

و الحالة الثانية أن تكون مواطن / طالب مجتهد فتدخل أي فرع تسمح لك به علاماتك بناءً على المفاضلة و بغض النظر عن رغبك و عجبك عجبك ما عجبك كنت دروس / درسي شوي كمان و جيب علامات أحسن من هي



تتخرج تتجه لسوق العمل و هنا لديك ثلاثة حلول:

1- أن تختار العمل في القطاع العام (إن وجد) فتنتظر دورك و عجبك عجبك ما عجبك روح شفلك شي شغل خاص يقبلك و يعطيك راتب أحسن من رواتب الدولة

2- و إما أن تختار العمل في القطاع الخاص فبتتوظف و عجبك عجبك ما عجبك تتحمل ساعات الشغل الطويلة و تفقيس مديرك يفتح الله و ألف واحد ببوس إيدنا لنحطو محلك

3- و إما أن تقرر السفر إلى بلاد الواق الواق و تحمل الغربة و الشنططة لتأمين حياتك أو بالأحرى لحتى تقدر تعيش و عجبك عجبك ما عجبك انضب بببلدك.



تصبح في سن الزواج (يعني بالعربي صار لازم تتأهل و تكمل نص دينك) فإذا كنت شاباً قد أسس نفسه بضروريات الحياة من بيت و عمل و غيره من الأمور أو كنت فتاةً تنازلت عن معظم أحلامها فيما يتعلق بشاب الأحلام و قررت (شاباً كنت أو فتاة) أن تعيش حياة الكفاح المشترك تحت شعار القناعة كنز لا يفني تزوجت و إلا عجبك عجبك ما عجبك خليك معنس و بلا هالنسل السعيد..



تقرر أنه حان الوقت للإنجاب و بعد حسبه طوييييييييييلة تكتشف بأنك يا دوب قدران تعيش و أنك بالكتير فيك تجيب ولدين و ساعتها عجبك عجبك ما عجبك جيبوا أكتر من ولدين و شوف شلون رح تشحدوا و إنتو أصلاً مو ناقصين...

ن.الحموي

[sarah]

يعني....ماني كتير مع هالمقال بكتير من النقط...على كل الي رجعة....
شكرا تايغر العزيز

[Hani]

تايجر مو كل هالقد
ع كل مشكور

[jida]

ميرسي تايغر مقال حلو

[marioma alghzayala]

شكرا عمو تايغر .
.. بس مو كانو مبالغ فيو شوي ؟؟؟

[أم الرور]

لا مبالغ و لاشي كلشي عم يحكيه مظبوط
سانكس تايغر

[Tulip]

رح يعجبني غصب عني..... احسن ما اضرب راسي بالحيط

بس تايغر بيضل عنا أمل انو بكرا احلى...... ما هيك علمتني؟؟؟؟؟؟؟

[marioma alghzayala]

أمل انو بكرا احلى

مشان هيك عايشين ....

[Hovanoov]

الموضوع هاد هو الموضوع....
ما حاد يعلق...عجبكوم عجبكوم...ما عجبكوم دقو راسكوم بالحيط............
يسلموا تايغر الموضوع صحيح ميه بالميه...وشكرا

[عاشقة القمر]

كتير الموضوع حلو
يسلم ايديك تايغر:smily (24):

[BALLACK KINGS]

جيد تايغر ...ميرسي

[tiger]

اعزائي انا قمت بنقل المقال مو لسبب انو بيوضح نظرتي للحياة ( انا أكيد متفائل اكتر من هيك مو؟؟!!! ) بس خليني اكتب شوية افكار متناثرة حول الموضوع ....
برأيي انو في نسبة كبيرة من الكلام المكتوب صحيحة يعني نحنا في كتير امور بتحصل معنا بحياتنا ما بنكون راضيين عنها و و بتخلينا احيانا انو ( انا ماني من هواة الفوتة بالحيط لانو في احتمال انو اطلع من الطرف التاني ) فهاي اكيد مو نهاية القصة .....
الحياة فعلا صعبة و ما في بقلبها رحمة و بتعاملنا بطريقة ( عجبك عجبك .. ما عجبك .. فرجيني شطارتك ) فاذا نحنا ما حاولنا انو نغلبها هي اكيد ما رح تعطينا ياللي بدنا ياه .....
الانسان ما لازم يستسلم و يسلم نفسه لمشيئة الاقدار ويضل يحاول دائما انو يغلب هالظروف المحيطة فيه .....
واكيد الكلام ياللي قالته توليب صحيح و كتير , دائما بوكرا اجمل و ما اصعب العيش لولا فسحة الامل ....
يا هلا بكل الشباب اللي مروا .....