مكانة المرأة

[نبيذومطر]

رد: مكانة المرأة

بسجل متابعة لرد على كل نقطة من أسئلتك ترنيمو

[نبيذومطر]

رد: مكانة المرأة

طبعاً بعيداً عن النثر و الشعر وكل الكلام الظريف يلي بينقال بحق المرأة وقت بينحكا بمكانتها

v المرأة نصف مجتمع ( حقيقة )
v المرأة ابتداء من العصور القديمة أخذت دور المربية بوصفها هي العنصر يلي بيستقبل عملية الحمل و الولادة و الارضاع ما بعد الولادة
v و كمان منذ القدم ، فرق التركيبة الجسمانية (مشان ما نبلش مصطلحات ) بين الرجل و المرأة ، و طبيعة المجتمعات القديمة ( الحروب الغزوات ) يلي بتحتاج للقوة العضلية ، ثبتت المرأة بفعل المربية و المسؤولة عن البيت و الاولاد أكثر من أي موقع ثاني

هي سرد بسيط و مختصر كثير ، أما بمجتمعاتنا حالياً :
v النظرة القديمة للمرأة ما تطورت او تغيرت بشكل جذري عنا بعكس الغرب يلي بلش يغير النظرة الها لما بلشت أوروبا تخرج من عصور تدخل الكنيسة بالسياسة و الأخطاء الكبيرة يلي صارت بوقتها ، و انتقلت لمرحلة العلمانية الاجتماعية ( لأنو العلمانية كفكر مناهض للفكر الديني ما بتحرر المرأة ، بس العلمانية كنظام سياسي بينظم المجتمع على أساس مدني ، ممكن يعطيها كثير فرص )
v نحنا بمجتمعات شرقية ، و ضمن مجتمعات غير علمانية و لازم ما ننسى أنو الأغلبية السكانية بمجتمعاتنا هيه من أخوتنا المسلمين فعلى هادا الأساس و بشكل أو بآخر في تسرب للنظرة للمرأة إسلامياً عبر التاريخ للوقت الحالي ( هدا الحكي مو ضد المرأة أو الإسلام هاد مجرد شرح موضوعي ) و بالتالي في مجموعة تقاليد عم تحكمها سلف حتى لو كانت غير مسلمة ، و العادات هيه عبارة عن دورها بالأسرة ، دورها برات الأسرة ، النظرة من على أيام ظهور الاسلام .. إلخ ( لحتى ما حدا يفهم كلامي على انو انتقاد )
v بدوائر أصغر ضمن المجتمع ، في اشيا عم تتغير بحسب الظرف ، يعني الضيق المادي عم يدفع باتجاه عمل المرأة من وين ما كانت تكون ، بس مع هيك عم تضل محكومة بضوابط اجتماعية الها علاقة بالحكي يلي فوق
v المرأة ذات نفسها و بعد المطالبة بالحقوق ، وصلت للحظة ضياع ، السبب بسسيط : المرأة كانت عم تطالب بحقها بالعمل و الانتاج على سبيل المثال ، لما انعطت هدا الحق تحت ضغط المعيشة ، تحول عمل المرأة من حق اكتسبتو لعبء عليها ، لأنو صارت عم تشتغل و بنفس الوقت ضلت مسؤولة و ملامة بشكل كامل عن التربية و البيت و الولاد .. إلخ و الحل كان بأنو المرأة لما تحصل على حق العمل تحصل بالمقابل على المشاركة من الرجل بأعباءها الثانية ، و هادا الشي ما عم يصير لهلق بشكل واسع ، و هدا الفرق بين اكتساب الحق بفعل الضغط مو بفعل تطور الفكر الاجتماعي
v ترنيم مو المرأة يلي عم يتم تنميطها ، المجتمع بكاملو عم يتنمط بتتالي السنوات ، و بيبلش نمطو يتغير بفعل الحركة الفكرية يلي بتصير داخلو ، بتبلش شوي شوي و أكيد ببقعات ضو كثير صغيرة ، و بتبلش تتحول لحركة بس يزيد عدد المشتركين بالفكر نفسو

اختصرت كثير و عم بتطلع بالرد لاقيه طويل !
بكل الأحوال خلينا ما نقسى على أي فرد سواء امرأة أو رجل ، و خلينا نعترف بأنو المرأة او الرجل يلي بيخرج عن اطار العادة و التقليد بمجتمعو ، إجمالاً يحارب اجتماعياً و باي موضوع كان ، فما بالكن اذا كان موضوع حساس ؟ و لتتغير طريقة النظرة للمرأة بالمجتمع ما بيكفي أنو امرأة توقف و تقول انا ما بقبل كون هيك ، بدنا ما لا يقل عن ربع النساء ( مثال واسع شوي بعرف ) ، لأنو هدول بيعنوا ربع نص المجتمع و بيأثروا بربع أسر المجتمع ، يعني عن طريق الاولاد رح يخلق عنا ما يقارب ربع جيل كامل يؤمن بأنو النظرة للمرأة و لدورها لازم تكون غير ، الفكر الاجتماعي بيتعامل من هادا المبدأ ، بمجتمعاتنا عالقليلة

لما بيكون في بداية نضوج فكري جوات المجتمع تجاه قضية معينة ، ما بتاخد القصة أكثر من 25 سنة لنبلش نحس الفرق فيها ( طبعاً 25 سنة فترة زمنية قصيرة كثير ) و خصوصي أنو الجيل يلي بيجي جديد بيبقا عم يربى على قيم جديدة و ما عم يربى على نمط معين و يرجع يرتد عليه فيما بعد مثل ما صار مع الآباء ، و هادا يلي بيعمل الفرق و يلي ممكن نراهن عليه

هدا رأيي باختصار شديد
و كرد مباشر : مكانة المرأة عم تتحسن يوم بعد يوم بمجتمعاتنا ، أحياناً بفعل ضغط ظروف المعيشة و أحياناً بسبب تطور الفكر الاجتماعي ( البطيء جداً بمجتمعاتنا )
المرأة لا يتم تنميطها من قبل الرجل ، لأنو المجتمع و الخوف من الخروج عنو عم ينمط الجنسين ، و ردود أفعالن تجاه بعضن عم تجي على هدا الأساس

تحياتي ترنيمو
و ماحدا يسبني عالرد الطويل

[word]

رد: مكانة المرأة

بغض النظر أنو المراة مخلوق مستقل وبحسن ينمط حالو لحالو بعتبر مجتمعاتنا كتير بتاثر عليها وع تصرفاتها بس شي عادي بكل مجتمع في عادات وتقاليد رح نكبر عليها سواء مرأة لأو رجل وشخصيتنا بتلعب دور مهم اكيد لحتى نعرف وين العادات بتنفع ووين بدها تغير

[ترنيم]

رد: مكانة المرأة

مشكور مطر لمشاركتك الرائعة
راجعة فصل فيها
بس اول شي حبيت اتشكرك لمشاركتك وقلك اضفت واغنيت

[ترنيم]

رد: مكانة المرأة

ورد كثير مششششششكورة لمشاركتك الجميلة المهمة
راجعتلها
بعد ماقلك منوووووووووووورة

[Iden]

رد: مكانة المرأة

المجتمع الو سبب بحياة المرأة
لان فيي كتيير فتيات بيحبوا يكون عندن حرية الرأي وحرية العمل وحرية التعامل مع المجتمع
بس المجتمع الشرقي يمنع كتيير اشياء تعملا المرأة
فلهل السبب المرأة كمان تتعود على هل الشي وتتاقلم مع الوضع
وبعدين بتصير هل الحالة حالة روتينية طبيعية مابتحس فيها .......

لان هون المراءة الغربية مختلفة تماما عن الشرقية

وشكرا ترنيم على فتح موضوع مهم للمناقشة

[ترنيم]

رد: مكانة المرأة

مششششششششششكور ايدن لمشاركتك واهتمامك
اشرت لنقطة كثير هامة وهية

فلهل السبب المرأة كمان تتعود على هل الشي وتتاقلم مع الوضع
وبعدين بتصير هل الحالة حالة روتينية طبيعية مابتحس فيها .......

والمحت لاختلاف الشرقية عن الغربية
ممكن توصفلنا هاد الاختلاف بهاي النقطة تحديدا كونك عايش بالغرب وميزت هاد الاختلاف

وياريت اخوانا واخواتنا اللي عايشين بالغرب يشاركونا برأيهن بهاي النقطة
لانو اكيد لمسوها باحتكاكهن بالمجتمع الغربي

ششششششششكرا كثير ايدن لمشاركتك واهتمامك
ونتأمل اجابتك

[ترنيم]

رد: مكانة المرأة

اخواتي صبايا المنتدى
ممكن تشاركونا ارائكن

للان ماسمعنا غير رأي ألين و ورد
يعني انتو كيف بتشوفوا وضعكن بالمجتمع او بالاسرة

ومشششششكورين سلف

[Sara Jesus]

رد: مكانة المرأة

عزباء أفضل من الزّواج
لأسباب كثيرة
عدم مراعاة شعور المرأة , وتذليلها من قبل الرّجل الظّالم .
تزويدها بمشاعر منبهة كي يستمتع هو , ولايهتم لمشاعرها .
المهم عند الرّجل

أمتلاك زوجته
مناقشة رائعة ترنيم

[Samar]

رد: مكانة المرأة

أنا من وجهة نظري بعتقد إنو المرأة في بداياتها سيطرت عليها إيدلوجية المجتمع يالي عايشه فيه و ما مننكر إنو هيي تنازلت عن كتير من حقوقها حتى حقها الإنساني.. كانو بيعتبروا المرأه كائن ليس له حق التعبير و إتخاذ القرارت بحكم إنو هيي كائن ضعيف وإنو هني الأقوى... و عندما إتيح للمرأة فرصة التعليم و التعرف على حقوقها البعض منهن فهم حقوق المرأه فهم مغلوط كتحرر المرأه الغربيه المبالغ فيه أو الفلتان بلهجتنا العاميه

[أبو حنا]

رد: مكانة المرأة

من نمط المرأة ؟؟؟
انا معلق على كلمة نمط
فهمت أنها فعل ماضي بس لساتني بحاجة لتوضيح أكتر

[Dreamy Girl]

رد: مكانة المرأة

برأيي أنا بشوف تم تنميطها
لأنو مافيها تعمل شي بأرداتها مع العلم الشي الي بتعملو يكون صحيح
وحتى لو اهل البنت يعطوها كامل الحرية حتى تعمل اي شي او تختار الشي او الشخص الي يناسبها بتصير تخاف من حكي الناس وأعتقداتهم عالعموم حكي كتير كتير وتبقى المرأة دائمآ خايفة او مترددة في أي شي تعملو
وشكرآ