ليش ينحذفلي موضوعين طالما انا ملتزم بقوانين المنتدى ؟

[اناماشي بدكمشي]

سلام المسيح للجميع

انا اول ما سجلت بالمنتدى قريت قوانينو ووافقت عليها و سجلت باسم مستعار مثل ما القوانين بتسمح.
اليوم انا كتبت موضوعين وكالعادة انا ملتزم بالاخلاقيات المسيحية و الاداب العامة المعروفة,
واذ افاجا ان الموضوع الاول قد حذف فكتبت اعتراض و شكوى و تظلم, وهذه ايضا حذفت.
اما التبريرات لحذف الموضوع الاول فلم تكن مدرجة في قوانين المنتدى فلست ملزم بها
واما على حذف الموضوع الثاني فلم ياتني اي تبرير ولا حجة.
وقد ذكرت مسبقا في احدى( محذوفاتي) انه طالما انني شاب مسيحي فانا انتمي تلقائيا الى هذا المنتدى ( الشباب المسيحي )حتى وان لم اكن مسجلا فيه, فكيف واذ قد سجلت!!؟
وانا انتظر من الادارة الكريمة ان تشير علي باعادة تنزيل الموضوع المحذوف ( الخاضع لقوانين المنتدى ), ولكم مني جزيل الشكر

[abogabi]

رد: ليش ينحذفلي موضوعين طالما انا ملتزم بقوانين المنتدى؟؟

هلا ومرحب

بالنسبة للإلتزام اعتقد إدارة ومشرفين المنتدى هم من يحددو ذلك ... أولا

أما عن مواضيعك

قد تمت مراسلتك بالسبب ولكن عملية الاقتناع بعد ذلك أمست بيديك

موضوعك الأول
هناك قسم خاص بذلك وله شروط
بامكانت تعديل الموضوع بشكل لا يخالف قوانين القسم الخاص إذا احببت ان يكون الموضوع خارج القسم

الموضوع الثاني
لأول مرة اشاهد مشاركة بالقول أنا مسيحي فلست انت ولا نحن من نحدد ذلك

بل جميعا نعمل لنصبح مسيحيين وبالافعال ليس بالأقوال

أما طلب التعرف عليك شخصي فالفكرة وصلتك بشكل خاطئ

دخول بعض الأقسام يلزم ذلك والسبب بخاصيتها وبالسبب الذي إنشأت من أجله

إذا احببت ذلك هلا ومرحب
أما اذ لم تحب أخي اناماشي بدكمشي بدنا سلامتك

[ابو جان]

رد: ليش ينحذفلي موضوعين طالما انا ملتزم بقوانين المنتدى؟؟

انا اول ما سجلت بالمنتدى قريت قوانينو ووافقت عليها و سجلت باسم مستعار مثل ما القوانين بتسمح.

بما انك قريت القوانين , لازم تكون مريت على هالفقرة

إن مالكي منتدى الشباب المسيحي - سوريا لديهم حق حذف، أو مسح، أو تعديل، أو إغلاق أي موضوع لأي سبب يرونه، وليسوا ملزمين بإعلانه

و مع هيك شرحتلك سبب الحذف برسالة خاصة و انت ما اقتنعت , حكينا عالمسنجر و شرحتلك سبب الحذف مرة تانية و مع هيك ما اقتنعت
ولما سألتك عن اسمك , كان هالشي لسهولة التواصل , لأنو ما فيني لما احكي معك خاطبك بـ " اناماشي بدكمشي " وقلتلك مو ضروري تعطيني اسمك الحقيقي اذا شايفا كتير صعبة و عطيني اي اسم بتفضل خاطبك فيه

اليوم انا كتبت موضوعين وكالعادة انا ملتزم بالاخلاقيات المسيحية و الاداب العامة المعروفة,
واذ افاجا ان الموضوع الاول قد حذف فكتبت اعتراض و شكوى و تظلم, وهذه ايضا حذفت.
اما التبريرات لحذف الموضوع الاول فلم تكن مدرجة في قوانين المنتدى فلست ملزم بها

قلتلك موضوعك ما فيو شي غلط " هي للمرة التالتة رح اشرحلك " بس موضوعك نزل بقسم غير القسم المناسب الو , هلا يا اما بدي انقلو عالقسم المناسب واللي هو قسم الـ keep in touch , يا اما بدي احذفو , وانا حذفتو لأنو ما فيك تفوت على هل قسم

هلا اذا بتحب بنقلك موضوعك على قسم ال keep in touch مع العلم انو مافيك تدخل على القسم و بالتالي ما فيك اتابع موضوعك

واما على حذف الموضوع الثاني فلم ياتني اي تبرير ولا حجة.
وقد ذكرت مسبقا في احدى( محذوفاتي) انه طالما انني شاب مسيحي فانا انتمي تلقائيا الى هذا المنتدى ( الشباب المسيحي )حتى وان لم اكن مسجلا فيه, فكيف واذ قد سجلت!!؟

الموضوع التاني , انت كتبت اسمو " رسالة خاصة الى السيد مجد " وكان محتوى موضوعك رد على رسالتي الخاصة لأنو ما فيك تبعت رسائل حاليا , لهيك قريت الموضوع و حزفتو " يعني فيك تقول وصلت رسالتك الخاصة الي " وانت كاتب بنهاية الموضوع " ( انا ما بيحقلي ارسل رسائل خاصة ) "لهيك اعتبرتو رسالة

ما حدا قلك انو ما بتنتمي للمنتدى , بس في اقسام معينة بتطلب شروط حتى تقدر تفوت عليها

وانا انتظر من الادارة الكريمة ان تشير علي باعادة تنزيل الموضوع المحذوف ( الخاضع لقوانين المنتدى ), ولكم مني جزيل الشكر

قوانين المنتدى ما ممكن تحتوي كل شي ممنوع ينزل او ممنوع ينحكا او كل المخالفات
قوانين المنتدى ممكن ينحط فيها الشي الاكيد ممنوع , يعني الشي اللي رح تتخالف عليه اذا ما تقيدت فيه

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى؟؟

دخول بعض الأقسام يلزم ذلك والسبب بخاصيتها وبالسبب الذي إنشأت من أجله
( يعني بفهم من هالشي انو في اهداف ظاهرة واهداف باطنة ) .

أما اذ لم تحب أخي اناماشي بدكمشي بدنا سلامتك

اخ ابو غابي
انا بشكرك مرورك على موضوعي
وهلا عيوني
بس انا مو ماشي بس هاي كنيتي ههههههههههه

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى؟؟

قوانين المنتدى ما ممكن تحتوي كل شي ممنوع ينزل او ممنوع ينحكا او كل المخالفات
قوانين المنتدى ممكن ينحط فيها الشي الاكيد ممنوع , يعني الشي اللي رح تتخالف عليه اذا ما تقيدت فيه

استاذ مجد
سلام المسيح عليك
انا كتبت موضوع وممكن يوخذ مني ساعة او ساعتين تفكير و صياغة و مراجعة و هيك يعني
وبالاخر ببعثو على اساس انو موضوع صميدعي و ناجح بفكرتو ومافي عندي ادنى شك انو ممكن ينحذف او انو في شغلات هيك و هيك بالموقع و منتديات مخفية و منتديات ظاهرة و قوانين عامة وقوانين خاصة و هالشغلات هاي كلها انا مالي فيها
وبتيجي بعد كل هالتعب بتيجي انت او اي مشرف مبجل اخر بيروحلي شغل ساعات بثانية وحدة
وقال شو
في منتدى كيب ان تتش لناس معينيين و لشغلات خاصة ما الها علاقة بالشباب المسيحي.
عرفت اخ مجد وين كل الاختلاف بيناتنا
ومستقبلا الله اعلم كمان شو ممكن يصير وانا ما كون عارف فيه
فياريت تنورونا و تصارحونا اكثر واكثر
وهلا عيوني

[على هامان يا لبنان]

رد: ليش ينحذفلي موضوعين طالما انا ملتزم بقوانين المنتدى ؟

وانا حابب اتدخل بعد اذن المشرفين يا أخ انتة ماشي بدنا شي........


1: المواضيع بالمنتدى بتنحذف او بتتكرر بحالات معينة وهيي: اذا كان الموضوع موجود من قبل....اذا كان الموضوع مخل بالاداب او طائفي .....اذا كان الموضوع مو موضوع...(( موجه لشخص معين وبس )) عدا عن ذلك كل انواع المواضيع موجودة يعني في مواضيع جريئة وجريئة كتير وما انحذفت لانها ما بتمس شخص او دين ...........لذلك بعتقد انو الموضوع يلي تعبت عليه كتير اكيد مكرر او في شي مو نظامي

2: الكيب اون تاتش فيه صور للعالم يلي شاركت بنشاطات ضمن المنتدى.....وانا متل ما فهمت انو اسمك الحقيقي مو رضيان تعطيه بقا باي حق عم تطالب تشوف صور لناس مو بس اسمائهن......واكيد انته مسيحيتك ما بتسمحلك تشوف صور لعالم انته ما بدك تشاركن بابسط الاشياء...(( اسمك ))

3: كل شي عم احكيلك ياه موجود مسبقا بالمنتدى ان كان بشروط التسجيل او بالتعريف عن القسم بس انا بعتقد انك ما قريتون لانك كنت عاطي كل وقتك لموضوعك يلي انحذف

بتمنى تكون وصلت الفكرة وتكون تكونت عندك صورة عن وضع المنتدى وقوانينو وانشالله بتنبسط معنا

[Molham Haddad]

رد: ليش ينحذفلي موضوعين طالما انا ملتزم بقوانين المنتدى ؟

وقال شو
في منتدى كيب ان تتش لناس معينيين و لشغلات خاصة ما الها علاقة بالشباب المسيحي.

ايوااا
يعني انت حكمت من عندك انو الشغلات ضمن الكيب ان توتش ماالها علاقة بالمنتدى او بالشباب المسيحي ؟؟؟؟؟؟؟

كيف وصلت لهذا الاستنتاج ورح استخدم مصطلحك "الصميدعي"
من بعد اذنك يعني
واكيد هاد بافتراض مني انو انت واصل لاستنتاج وانو معنى الحكي متل ما انا فهمت !!! إذا انا غلطان صلحلي بليز

ومستقبلا الله اعلم كمان شو ممكن يصير وانا ما كون عارف فيه

والله معك حق لازم يتاخذ رأي كل عضو وعضوة بالمنتدى لما الادارة تعمل شي شغلة جديدة او تطور او تقسم

والذ شي هي

فياريت تنورونا و تصارحونا اكثر واكثر

انو كيف ما بيكون عندك انت (فرد) خبر وفجأة بتطالب بمصارحتكن (جماعة)
!!!!!!

بصراحة انا مستغرب
يا صديقي انت حاليا ما بيحقلك تبعت رسائل خاصة
فالشيخ طلب منك الماسنجر ليحكي معك مباشرة صح ولا انا غلطان ؟؟؟
ببساطة حكي معو هونيك
اما انك تحاسب
الادارة
على انو ليش مسكرين القسم عني مع اني ما بعرف حدا ولا بدي عرف عن حالي
فالعفو

متل ما قال هامان
في صور وفي خصوصية للناس يا معلم
واكيد انت ما بتحب انو حدا يتحركش بخصوصيتك
ما تزعل مني اذا حسيت بشوية حدية

صدق بمحبة عم احكي

[abogabi]

رد: ليش ينحذفلي موضوعين طالما انا ملتزم بقوانين المنتدى ؟

أخي ماشي كانو ها أنت يلي بدك منا شي

وشباب محلولة

يعني الموضع الصميدعي مع طلب وضع الصور اخد من وقتو ساعة لساعتين طبعا مع تفكير

فـ بدكم شي بيومين ليوصل السبب

طبعا كمان مزح بس ما قدرت

ع الهامش
مزح مبطن

[abogabi]

رد: ليش ينحذفلي موضوعين طالما انا ملتزم بقوانين المنتدى ؟

أما إدارياً

الفكرة ليست بالاختلاف وإنما نتيجة تسرعك باستنتاج الأفكار
فأخي ماشي مارح يمشي الحال إلا إذا اعدت قراءة التوضيح للسبب كما ورد بالبدء وبتمعن

فما ورد بالاقتباس الذي أوردته معناه

عند وضع القوانين تتم صياغتها بشكل مباشر لحد ما
بالاضافة إلى الاشارة ببعض القوانين كرؤوس أقلام

وهنا يبقى استناتجها مرتبط بوعى واستيعاب المتلقي " وطبعا لا نبخل بشرحها "

ومثال لاوضح لك أكثر

قسم خاص بالحوار المسيحي المسيحي مغلق
هل يجب علينا أن نكتب بصريح العبارة
يرجى عدم دخول المسلمين
أو يجب على المسيحيين فقط أن يدخلو القسم

أكيد لأ
وإنما بتطبيق بعض الشروط والقوانين تقدر لحد ما أن تحدد وتضبط عدد أعضاءه

وأيضا لا يمكن لهذه الشروط أن نطلب بها مثلا
كم أيد إلك أو مربي دقن وحالق شواربك

ورغم تحول الحديث من معرفة أسباب حذف موضوعك إلى .... معرفة أهداف ومن ثم إتهام
وهي أيضا مخالفة بإمكانك متابعتها بقوانين المنتدى

يعني مع ذلك ...

قوانين المنتدى تجدها بلوحة الإعلانات

أما شروط وشرح الأقسام المغلقة وغير المغلقة
فتجدها بجانب اسم القسم كـ تعريف لكيفية التعامل أو الدخول للقسم

الأسباب والشروط والقوانين
هي ضوابط لتحديد سير عمل
ولم تاتي من عبث
وأيضا لا يوجد فيها تمييز

أما الأهداف بأي عمل فهي ترسم كي تتحقق مستقبلاً
وبإمكانك مشاهدة منظورنا لها عبر موضوع نشأة المنتدى

فكما أخبرتك سابقا بأنه لا نحن ولا انت من نحدد مسيحيتك
أيضاً لست انت من تحدد إن كان عملنا له علاقة بالشباب مسيحي أم لا

فعملنا لا يقيمه فرد أو حتى عدة أفراد بفكر معين

ومثال صريح لـ غاية قوانين المنتدى

ولنقل هدف واضح
كي لا يمر مشارك مرور الكرام ينظّر أو يتهم والسلام

أي تصبح قادر بتطبيق الشروط والقوانيين ولحد ما أيضاً

أن تستنج الموضوع هدفه واضح أم مبطن

وع الهامش
هي 2 مبطن الـ 3 تربح مشرف مبجل

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

وانا حابب اتدخل بعد اذن المشرفين يا أخ انتة ماشي بدنا شي........


1: المواضيع بالمنتدى بتنحذف او بتتكرر بحالات معينة وهيي: اذا كان الموضوع موجود من قبل....اذا كان الموضوع مخل بالاداب او طائفي .....اذا كان الموضوع مو موضوع...(( موجه لشخص معين وبس )) عدا عن ذلك كل انواع المواضيع موجودة يعني في مواضيع جريئة وجريئة كتير وما انحذفت لانها ما بتمس شخص او دين ...........لذلك بعتقد انو الموضوع يلي تعبت عليه كتير اكيد مكرر او في شي مو نظامي

2: الكيب اون تاتش فيه صور للعالم يلي شاركت بنشاطات ضمن المنتدى.....وانا متل ما فهمت انو اسمك الحقيقي مو رضيان تعطيه بقا باي حق عم تطالب تشوف صور لناس مو بس اسمائهن......واكيد انته مسيحيتك ما بتسمحلك تشوف صور لعالم انته ما بدك تشاركن بابسط الاشياء...(( اسمك ))

3: كل شي عم احكيلك ياه موجود مسبقا بالمنتدى ان كان بشروط التسجيل او بالتعريف عن القسم بس انا بعتقد انك ما قريتون لانك كنت عاطي كل وقتك لموضوعك يلي انحذف

بتمنى تكون وصلت الفكرة وتكون تكونت عندك صورة عن وضع المنتدى وقوانينو وانشالله بتنبسط معنا

اخي هامان
على راسي كل الشروط تبع المنتدى وانا وافقت عليها ومشان هيك سجلت
انت الظاهر ما قريت الموضوع يلي انحذفلي
انا لا بدي افوت على الكيب اون تتش ولا كنت بعرف فيه اصلا بس انا كتبت موضوع الظاهر انو اثار حفيظة ناس معينة بالمنتدى لسبب انا لا اعلمه بداعي انو الموضوع مابينطرح على العام مع ان كل الموضوع تبعي لا يسيئ البتة لاي شخص بل على العكس كله مديح و اعجاب وهذا الذي ازعجني لحذفه
و بعد ان تم حذف الموضوع طلب مني السيد مجد ان يتعرف علي ولو انه لم يحذف الموضوع لكنت اعطيته مش بس اسمي لكن حتى عنوان البيت
وهاي كل القصة عمي هامان
وحلا بيك

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

بصراحة انا مستغرب
يا صديقي انت حاليا ما بيحقلك تبعت رسائل خاصة
فالشيخ طلب منك الماسنجر ليحكي معك مباشرة صح ولا انا غلطان ؟؟؟
ببساطة حكي معو هونيك
اما انك تحاسب
الادارة
على انو ليش مسكرين القسم عني مع اني ما بعرف حدا ولا بدي عرف عن حالي
فالعفو

متل ما قال هامان
في صور وفي خصوصية للناس يا معلم
واكيد انت ما بتحب انو حدا يتحركش بخصوصيتك
ما تزعل مني اذا حسيت بشوية حدية

صدق بمحبة عم احكي

يااااا اخي ملهم
انت كمان فهمان الموضوع غلط
اساسا انا من بعد ماشفت الصور و عرفت كل شي خطر ببالي الموضوع و كتبتو
و الصور ماكان فيها شي عيب و كل الناس لابسة و مثل الليرة
وشو خصوصيات وما خصوصيات ( بصراحة مابعرف شو بدي اقلك عن هالخصوصيات )
يا ريت تكون وصلت الفكرة البريئئئئئئئئئئة وهاي مني احلى جرزة ورد

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

أخي ماشي كانو ها أنت يلي بدك منا شي

وشباب محلولة

يعني الموضع الصميدعي مع طلب وضع الصور اخد من وقتو ساعة لساعتين طبعا مع تفكير

فـ بدكم شي بيومين ليوصل السبب

طبعا كمان مزح بس ما قدرت

ع الهامش
مزح مبطن

اخي ابو غابي
انا لاني عضو بمنتدى الشباب المسيحي قلت ساعتين
انا بكتب مقالات بمواقع ثانية بتوخذ معي المقالة الوحدة مش اقل من عشر ساعات شغل متواصل
واذا بتحب بعطيك الرابط
وانا عم احكي جد
وجد مبطن من برا ومن جوا

[نبيذومطر]

رد: ليش ينحذفلي موضوعين طالما انا ملتزم بقوانين المنتدى ؟

حبيبنا يسعدلي صباحك و مساك

بترتيب الردود :
_ أبو غابي
_ مجد
_ على هامان ( عماد )
_ ملهم

وضحولك الفكرة أكثر من مرة .. فما بعرف شو بدي زيد

بس هون نحنا النا عتب أخوي عليك على فكرة

تفرج معي :

1 _ ولو :

دخول بعض الأقسام يلزم ذلك والسبب بخاصيتها وبالسبب الذي إنشأت من أجله
( يعني بفهم من هالشي انو في اهداف ظاهرة واهداف باطنة ) .

أخونا و حبيبنا ..
لنفترض انت عندك بيت ملك بشي مصيف .. بتعطي مفتاح البيت لكل أهلك و قرايبينك و رفقاتك ( لاحظ معي ما عم ننكر صفة القربة و لا الرفقة ) .. ولا بيكون بيهمك أنو يكون الكل ( من يلي ببيتواجدوا بهالبيت ) متطمن لأي شخص رح يكون موجود بهالبيت يلي بيجمعكن وقت بتطلعوا سوا كعيلة ؟
يعني انت ممكن تعزم شخص على هالبيت و انت لسا ما بتعرفو .. صدفتو بالطريق مثلا و قلك مرحبا قلتلو هلا ؟
ممكن تقلو تفضل معنا طالعين أنا و أهلي ؟ ولا بدك عالقليلة تكون انت بتعرف مين هوه ؟!
الموضوع بهالبساطة .. لأنو كإدارة هي مهمتها و مسؤوليتها عالمنتدى و بنشاطاتو .. مثل انت لما بتكون صاحب البيت .. بيكون التحضير و التشكيل مسؤوليتك انت
فهون أول عتب على هالجملة :

( يعني بفهم من هالشي انو في اهداف ظاهرة واهداف باطنة ) .

إلا اذا انت بتعتبر أنو من حق اي شخص ما بتعزمو على بيتك الصيفي قبل ما تتأكد منو .. يتهمك بأنك عم تستخدمو لغير نوايا

2 _ شوف معي هون :

وبتيجي بعد كل هالتعب بتيجي انت او اي مشرف مبجل اخر بيروحلي شغل ساعات بثانية وحدة

أخونا و حبيبنا كمان مرة .. انا قريت الموضوع المحذوف ما رح احكيك بفكرة الساعتين .. بس بدي منك طلب
انا نبيذ ومطر .. انت لسا ما بتعرفني .. قعدت جهز حالي اسبوع كامل و جيب غراض و تياب لاطلع معك على بيتك الصيفي يلي حكينا عنو فوق .. اجيت انت قلتلي العفو منك بس انا لسا ما بعرفك و حابب اتعرف عليك أكثر و بعيوني بتطلع معنا و منقعد أحلى قعدة ..بس لاتعرف عليك أكثر اذا مو مشاني مشان أهلي اللي طالعين معي ..

برأيك بيحقلي احكيك بهالتهكم ؟!
أو قلك شو يا استاذ طيرتلي تعبي اسبوع كامل ؟! أو مين الشخص المبجل يلي طالع معك لحتى اعترض و روحلي تعبي ؟!

احسبها بهالبساطة

3 _ هون عتب كثير كبير :

في منتدى كيب ان تتش لناس معينيين و لشغلات خاصة ما الها علاقة بالشباب المسيحي

بيتك الصيفي للأهل و الحباب و الرفقة ولا لشغلات خاصة منافية للمسيحية و أخلاقياتها ؟!
انا بيحقلي احكم ؟!
ما انا ما فتت عليه للبيت
و الاهم من هيك أنت قلتلي من قبل : ( العفو منك بس انا لسا ما بعرفك و حابب اتعرف عليك أكثر و بعيوني بتطلع معنا و منقعد أحلى قعدة .. بس لاتعرف عليك أكثر اذا مو مشاني مشان أهلي اللي طالعين معي .. )

معقول انا اسمح لحالي اتهمك هيك اتهام ؟! و بمين ؟! بأهلك بأحبابك برفقاتك يلي بتقضي معهن الوقت ؟! اديش بكون غلطان بحقك بوقتها ؟! اديش ؟؟؟!!!!
عن جد عتب كبير .

4 _ و كمان هون :

ومستقبلا الله اعلم كمان شو ممكن يصير وانا ما كون عارف فيه
فياريت تنورونا و تصارحونا اكثر واكثر

تخيل لو أنا عم بحكيك هيك من بعد ما قلتلي ( العفو منك بس انا لسا ما بعرفك و حابب اتعرف عليك أكثر و بعيوني بتطلع معنا و منقعد أحلى قعدة .. بس لاتعرف عليك أكثر اذا مو مشاني مشان أهلي اللي طالعين معي .. )

انا راضي ضميرك .. شو بتكون ردة فعلك ؟!
تخيل أني عم بحكيك هالحكي لأ و عن مين عن أهلك عن رفقاتك عن العالم اللي بتحبهن و بتقضي وقتك معن .. بشرفك شو بتجاوبني ؟
عن جد عتب كثير كبير .

5 _ هي عن جديد :

انا لا بدي افوت على الكيب اون تتش ولا كنت بعرف فيه اصلا بس انا كتبت موضوع الظاهر انو اثار حفيظة ناس معينة بالمنتدى لسبب انا لا اعلمه بداعي انو الموضوع مابينطرح على العام مع ان كل الموضوع تبعي لا يسيئ البتة لاي شخص بل على العكس كله مديح و اعجاب وهذا الذي ازعجني لحذفه

كمان مرة

ظريف كثير تقلي ( يا أخي ما بيمشي الحال تسألني شو عملنا و شو ساوينا وقت طلعنا لنتصيف بالبيت وتقلي ناولني الصور بدي اتفرج عليهن حتى بحسن نية ..
لأنو اساسا أنا لسا ما بعرفك و اساسا انتا لسا ما صرت معني بالموضوع )
اجي قلك أنا :
انت شكلك متدايق .. يا أما في حدا كرهاني من أهلك أو رفقاتك .. و الا انت ما كنت سكرت الحديث
تقوم تقلي :
لك يا حبيبي انطور بيجوز بكرا تطلع معنا انت و أختك أو انت و مرتك .. معقول يعني تقبل امسك الصور و ورجيها للعالم ؟! بالعكس انت لازم تنبسط مني و تصير مأمن وقت بدك تطلع معي اذا صار في مجال و طلعنا ..

أوك ؟!
و صدقني ما حلوة لهجة الاتهام بحق اي شخص عم يمارس مسؤوليتو ليجنب اي شخص أي اشكال .. صدقني ما حلوة

6 _ هي :

يااااا اخي ملهم
انت كمان فهمان الموضوع غلط
اساسا انا من بعد ماشفت الصور و عرفت كل شي خطر ببالي الموضوع و كتبتو
و الصور ماكان فيها شي عيب و كل الناس لابسة و مثل الليرة
وشو خصوصيات وما خصوصيات ( بصراحة مابعرف شو بدي اقلك عن هالخصوصيات )
يا ريت تكون وصلت الفكرة البريئئئئئئئئئئة

أخي انت ليش شتيت عن السبب ؟!
مجد و ابو غابي و حتى عماد و ملهم وضحولك فكرة ( خصوصيات ) ما حدا جاب سيرة العيب .. فمن وين اجت ؟!
أما شو يعني خصوصيات .. فأكيد انت ما رح تعتبرها شغلة كثير طبيعية تلاقي صورة مرتك بجزدان حدا مثلاً ( هي اقل شي )

و مشان الفكرة البريئة :
ارجاع تأكد من الأرقام من واحد لخمسة .. و تأكد هالتلميحات شو هيه ؟!
فاذا انت كتبتها بتسرع أو انفعال .. فهون صار عتبنا عليك أكبر .. أما اذا مقصودة فعتبنا بيضل مثل الأول يعني : كثير كبير

7 _ بالآخر :

اخي ابو غابي
انا لاني عضو بمنتدى الشباب المسيحي قلت ساعتين
انا بكتب مقالات بمواقع ثانية بتوخذ معي المقالة الوحدة مش اقل من عشر ساعات شغل متواصل
واذا بتحب بعطيك الرابط
وانا عم احكي جد
وجد مبطن من برا ومن جوا

حبيب القلب
بس في ملاحظة صغيرة :
دقق بأي رد انكتب من الشبيبة ابتداء من المشرف العام و بعدين مجد مالك الموقع وصولاً لملهم و عماد .. بتلاحظ انها ردود مهتمة و عم تشرح بتفصيل و عم تاخدلك كلامك مع اهتمام بكل حرف عم تكتبو .. ما هيك ؟
طيب معقول تضيع تعب الشبيبة يلي كتبوا ؟!
انو دقق بردك على أول مشاركتين من مجد و أبو غابي .. انت ما رديت على مشاركاتهن .. انت اخدت جملة جملة عالماشي .. و حطيت تلميحات و استنتاجات .. طيب معقول ؟!

أنو يعطيك العافية الك و لأي شب أو صبية بيتعب على مواضيعو و كثير مننبسط بهالقصة .. بس كمان لأنك بتتعب و قاعد ساعتين عالموضوع ( يلي قريتو ) .. معناها أكيد بتقدر تعب غيرك وقت بيكتب رد مفصل و مهتم .. ما هيك ؟!


حبيبنا

[خريستوفوروس]

رد: ليش ينحذفلي موضوعين طالما انا ملتزم بقوانين المنتدى ؟

احكولي القصة أنا بحكم ..
بس كيف شفت الصور أخي أنا ماشي ؟؟

[Molham Haddad]

رد: ليش ينحذفلي موضوعين طالما انا ملتزم بقوانين المنتدى ؟

يااااا اخي ملهم
انت كمان فهمان الموضوع غلط
اساسا انا من بعد ماشفت الصور و عرفت كل شي خطر ببالي الموضوع و كتبتو
و الصور ماكان فيها شي عيب و كل الناس لابسة و مثل الليرة
وشو خصوصيات وما خصوصيات ( بصراحة مابعرف شو بدي اقلك عن هالخصوصيات )
يا ريت تكون وصلت الفكرة البريئئئئئئئئئئة وهاي مني احلى جرزة ورد

بصراحة انا ما ني شايف وين الغلط بحكي معك سابقا يا ريت توضحو بطريقة نبيذ ومطر يعني الاقتباسات بكون ممنون

واساسا لما قلت انك شفت الصور
وما عم تقول لمجد مين انت او شو اسمك صرت حس انو انت بتعرف حدا من اللي طلعو

او شخص بيعرف الناس فاتح عندو القسم
يا هيك يا بدي احكي بالمشرمحي بيجوز تكون واحد من الناس اللي مفتوح عندن القسم ومسجل باسم وهمي لغاية في نفس يعقوب حلو الحكي هيك يعني !!!!!!!!!!!!!

واكيد الصور ما كان فيها عيب والكل كان لابس فبلاها هاللهجة مو حلو ة بحقك
!!!!!!!
واساسا لما تقول انك عرفت كلشي فشو هالشي اللي مخبا
الكل بيعرف
انو في تعارفات شخصية صارت بين الاعضاء بالمنتدى وتحولت لصداقات وصار في طلعات للاصدقاء سوا
وما في شي مخبا
الا الصور لأنو هي النت
مو كل اللي فيها ولاد عالم وناس وانت اكيد محتك بهيك نمر ع النت
(مين مو محتك معن هدول!!)
وقول شو عندك عن الخصوصيات ؟؟؟؟؟؟؟؟؟

الرد الانسب ع هالحكي هو اللي قالو نبيذ ومطر
:icon (14):
اما جرزات الورد فمقبولة منك وان كنت جاي ع بالي تبولة فحولها بقدونس المرة الجاي
هامش :

الفكرة بريئئة قلتلي !!!!!!!!!!!!!!!!!
وبنفس الوقت الردود جد ومبطنة من برا ومن جوااا
؟؟؟؟؟؟؟؟
ع الاغلب رح تربح مشرف مبجل ع قولة ابو غابي

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

وضحولك الفكرة أكثر من مرة .. فما بعرف شو بدي زيد

إلا اذا انت بتعتبر أنو من حق اي شخص ما بتعزمو على بيتك الصيفي قبل ما تتأكد منو .. يتهمك بأنك عم تستخدمو لغير نوايا
اجيت انت قلتلي العفو منك بس انا لسا ما بعرفك و حابب اتعرف عليك أكثر و بعيوني بتطلع معنا و منقعد أحلى قعدة ..بس لاتعرف عليك أكثر اذا مو مشاني مشان أهلي اللي طالعين معي ..

بيتك الصيفي للأهل و الحباب و الرفقة ولا لشغلات خاصة منافية للمسيحية و أخلاقياتها ؟!
يا أخي ما بيمشي الحال تسألني شو عملنا و شو ساوينا وقت طلعنا لنتصيف بالبيت وتقلي ناولني الصور بدي اتفرج عليهن حتى بحسن نية ..
بالعكس انت لازم تنبسط مني و تصير مأمن وقت بدك تطلع معي اذا صار في مجال و طلعنا ..

أما شو يعني خصوصيات .. فأكيد انت ما رح تعتبرها شغلة كثير طبيعية تلاقي صورة مرتك بجزدان حدا مثلاً ( هي اقل شي )

شكرا لتعبك استاذ نبيذومطر على هالكلام المفصل و يلي من الواضع انو برغم كل تعبك فيه من الواضح انك مانك فهمان القصة او مافهموك القصة مزبوط
شوف يا سيدي القصة المزبوطة:
انا كنت قاعد بامان الله لا الي ولا علي واذ و بطريقة ما بتصلني مجموعة من الصور لناس مابعرفهم كلياتهم او فيك تقول مابعرف حدا فيهم
سالت
مين هذول العالم
قالولي انت بمنتدى الشباب المسيحي
قلتلهم ايه
قالولي هذا فلان وهذا فلان وهاي فلانة وووو
كانو يوم الجمعة بالمكان الفلاني وووووو
انا بيني و بينك انبسطت بالصور و ماني عرفان ان الكلام بهالموضوع محظور عالعام
انا رحت عالكومبيوتر و فتحت النت على موقع الشباب و قلبت فيه وما لقيت اي موضوع بهالخصوص
وبطيبة قلبي رحت كاتب موضوع عن التعارف الشخصي بين اصدقاء النت و الانطباع الاول شلون كان و بحكم ان شباب المنتدى طلعو طلعة هيك جبتها بالسيرة و طلبت اذا في مجال تنحط صور جماعية و ذكرت بدون تحديد الشخصيات بالصور ( و الاستاذ مجد بيشهد على صحة كلامي )
وما قلت ليش ماخبرتونا ولا قلت شي من هالحكي ولا ببالي اساسا
اخ نبيذومطر
انا نزلت الموضوع وثاني يوم بدي شوف اذا في ردود قمت لقيت رسالة خاصة فيها الكثير من الاسئلة عني اسمي و شلون تعرفت عالمنتدىوشلون عرفت بالرحلة ومن اي محافظة ورقم الهاتف و كثير كثير شغلات قد ماقولك واكثر
وطبعا الموضوع الذي انشاته حذف و الرسالة هاي اجتني من الاستاذ مجد
هاي الرسالة ازعجتني كثير لعدة اسباب واهمها انها جاءت بعد حذف الموضوع وانا قلت له لو انك سالتني اي سؤال قبل الحذف لاجبتك وليس من مانع ابدا
اما بعد ان تحذف الموضوع فلا
اخ نبيذ ومطر انا قدرت لك تعبك في ردك فشرحت لك الموضوع من اولو واما الاقتباسات اعلى فهي لاوضح لك انك فاهم الموضوع غلط

]نبيذومطر;417254]
انو دقق بردك على أول مشاركتين من مجد و أبو غابي .. انت ما رديت على مشاركاتهن .. انت اخدت جملة جملة عالماشي .. و حطيت تلميحات و استنتاجات .. طيب معقول ؟!

أنو يعطيك العافية الك و لأي شب أو صبية بيتعب على مواضيعو و كثير مننبسط بهالقصة .. بس كمان لأنك بتتعب و قاعد ساعتين عالموضوع ( يلي قريتو ) .. معناها أكيد بتقدر تعب غيرك وقت
بيكتب رد مفصل و مهتم .. ما هيك ؟!

اخ نبيذومطر
اعذرني فلكل اسلوبه في الرد وانا لا ارد على حرفية رايك وانما ارد على روح الراي
اكيد مو معترض على كل رايك وانما على بعض فقراته و التي من الممكن ان ارد عليها بشكل مجمل
واحيانا كثيرة الرد بيكون خارج عن الموضوع فلا اقدر ابدا ان ارد عليه وليس ذنبي تعبه الذي ذهب هباءا منثورابل ذنبه هو انه لم يتقصى وراء حقيقة المشكل
وهنا اتوجعه بالتقدير للشاعر الصغير الذي لم يشا ان يدخل في النقاش بدون ان يعرف الموضوع
وهلا عيوني اخ نبيذومطر
اسمك كثير حلو لفظا و واقعا
مافي اطيب من كاسة نبيذ حلو بيوم ماطر بعز البرد

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

احكولي القصة أنا بحكم ..
بس كيف شفت الصور أخي أنا ماشي ؟؟

هلا اخي الشاعر الصغير
انت اطلب يلي بدك اياه على راسي لانك ما حبيت تفوت بنقاش انت موعرفان قصتو من اساسا
انا فعلا بحييك والك مني احلى جرزة ورد هههههههههههه
و وردة

[اناماشي بدكمشي]

رد: ليش ينحذفلي موضوعين طالما انا ملتزم بقوانين المنتدى ؟

بصراحة انا ما ني شايف وين الغلط بحكي معك سابقا يا ريت توضحو بطريقة نبيذ ومطر يعني الاقتباسات بكون ممنون
كرمالك هالمرة رح استخدملك اسلوب نبيذومطر مع انو مو اسلوبي ابدا

واساسا لما قلت انك شفت الصور
وما عم تقول لمجد مين انت او شو اسمك صرت حس انو انت بتعرف حدا من اللي طلعو

او شخص بيعرف الناس فاتح عندو القسم
يا هيك يا بدي احكي بالمشرمحي بيجوز تكون واحد من الناس اللي مفتوح عندن القسم ومسجل باسم وهمي لغاية في نفس يعقوب حلو الحكي هيك يعني !!!!!!!!!!!!!
لا اتطمن من هالناحية انا مالي اسم ثاني بقوت فيه عالكيب ان تتش
واكيد الصور ما كان فيها عيب والكل كان لابس فبلاها هاللهجة مو حلو ة بحقك
!!!!!!!
لعيونك بلاها بس صدقني غصب عني احيانا الواحد بيضطر يستخدم اسلوب الصدمة حتى يوصل فكرتو
واساسا لما تقول انك عرفت كلشي فشو هالشي اللي مخبا
الكل بيعرف
انو في تعارفات شخصية صارت بين الاعضاء بالمنتدى وتحولت لصداقات وصار في طلعات للاصدقاء سوا
وما في شي مخبا
الا الصور لأنو هي النت
اخ ملهم
انا ماكنت عارف بهيك طلعات وفوتات غير بالصدفة ويمكن هاذ هو السبب يلي خلاني ببساطة روح واحكي بهالسيرة, وانا حكيت فيها بشكل ايجابي و السيد مجد عارف كل شي, ويلي انا كتبتو بالموضوع مابيزيد شي عن يلي انت كتبتو هلا, وبصراحة انا بستغرب شلون السيد مجد ما حذفلك تعليقك هاذ, لانو بصراحة عبر بشكل اكبر عن الموضوع يلي انحذفلي
مو كل اللي فيها ولاد عالم وناس وانت اكيد محتك بهيك نمر ع النت
(مين مو محتك معن هدول!!)
وقول شو عندك عن الخصوصيات ؟؟؟؟؟؟؟؟؟
انا معاك بهالحكي
الرد الانسب ع هالحكي هو اللي قالو نبيذ ومطر
:icon (14):
انا رديت على الاستاذ نبيذ

اما جرزات الورد فمقبولة منك وان كنت جاي ع بالي تبولة فحولها بقدونس المرة الجاي

انا فهمان عليك مابدك تكبن
هامش :

الفكرة بريئئة قلتلي !!!!!!!!!!!!!!!!!
صدقني بريئئئئئئئئئئئة

وبنفس الوقت الردود جد ومبطنة من برا ومن جوااا ؟؟؟؟؟؟؟؟
صدقني جد
ع الاغلب رح تربح مشرف مبجل ع قولة ابو غابي

دخلك ومنين بستلمو هاذ
عكل في لسا الي متابعة للموضوع
لاتواخذونا

[Molham Haddad]

رد: ليش ينحذفلي موضوعين طالما انا ملتزم بقوانين المنتدى ؟

انا كنت قاعد بامان الله لا الي ولا علي واذ و بطريقة ما بتصلني مجموعة من الصور لناس مابعرفهم كلياتهم او فيك تقول مابعرف حدا فيهم
سالت
مين هذول العالم
قالولي انت بمنتدى الشباب المسيحي
قلتلهم ايه
قالولي هذا فلان وهذا فلان وهاي فلانة وووو
كانو يوم الجمعة بالمكان الفلاني وووووو

معلم من بعد اذنك بدنا منك صورة من هالصور لأنو انا كنت موجود بالطلعة
هي واحد

2 مين اللي بعتلك ياها بهمني اعرف لأنو كل اللي طلعو معروفين

[خريستوفوروس]

رد: ليش ينحذفلي موضوعين طالما انا ملتزم بقوانين المنتدى ؟

شكراً حبيب .. إذا أنت ما نزلت الصور فأنا شايف القصة ما فيها شي بالعكس مبين من المحبة .. أما إذا منزلن فمعنا صبايا و هالشي مرفوض ..
بس سؤالي هو سؤال الكل .. انو الصور كيف جبتن ؟؟