هل الرب يستحق صفة العادل أم لا ؟

[apolone]

ياترى هل الرب بيستاهل صفة العدل ولا لأ؟؟؟؟؟؟
سألت حالي كتير بس بدون فائدة:
ليش في ناس معاقين ليش الرب خلقهن،مشان يعذب أهلن عغلط عملو من قبل؟ طب شو ذنبو هالمعاق؟أو بالأحرى شو هوي هالذنب اللي عملو الأهل ليتعذبو بهالطريقة؟إختبار
شو هالاختبار؟ الرب بيختبر الإنسان بشي في يحملو مو بهيك شي!
طب ليش خلق للأنثى غشاء بكارة وما خلق واحد للذكر كمان؟؟وكأنو عميقول أنو الذكر في يعمل اللي بدو ياه أما الأنثى لا؟؟؟
ليش نزل إبليس من الجنة للأرض مع أنو هوي كان الملاك الوحيد اللي عمل صح بعدم
سجوده لآدم وحواء لأنو قال :"أنا من نار وهما من تراب، ولا أسجد إلا لخالقي"؟
ليش صار إبليس شيطان بمثل قوة الشر بالكون يعني ليش الله بدال ما يقتلو أو يعذبو خلاه الشر بالعالم؟
طيب الإنسان مسير ولا مخيير بأفعالو؟كل الأديان أكدت انو مخيير بس كيف هالشي مادام
الرب بيعرف كلشي بما في المستقبل،بيعرف شو صار ،شو عما يصير،بس شو بدو يصير
(مابظن).
كيف بدو يحاسبنا عشغلات هوي كاتبلنا إياها بهالحالة صار الإنسان متل حر الشطرنج أو
متل برنامج كمبيوتر متل ما بتصممو بيعمل!
ليش الواحد بيخلق ع دين أبو هي نص مصيبة للمسيحي واليهودي بس للمسلم كارثة إذا حب
يغير دينو لأنو بيعتبرو مرتد فبيعطو مهلة 3 أيام بحاولو يغيرولو قرارو فيها وإذا ما قبل
عقوبة المرتد القتل!!!!!!!!!
وبعد كل هالشي وين العدل ياجماعة حدا يخبرني عنجد دويخة بتدوخ

[Molham Haddad]

رد: هل الرب يستحق صفة العادل أم لا؟؟؟

ياترى هل الرب بيستاهل صفة العدل ولا لأ؟؟؟؟؟؟

بكل تأكيد وجرأة بقول نعم يستحق

سألت حالي كتير بس بدون فائدة:
ليش في ناس معاقين
لمجرد انو في اناس بيولدو مع اعاقات جسدية او عقلية او حتى نفسية
ظاهرة هالشي ما بيجعلن مكروهين او مرفوضين من الله العادل ولو انت فعلا سائل حالك هالسؤال بامانة
لكنت شفت انو ما في انسان على هالارض الا ما بيحمل اعاقة وان كانت غير ظاهرة دائما الا انو هالشي ما بيخليها تقل خطورة او اقل عرقلة من انسان ولد بدون ايد او رجل

ببساطة الاعاقة هي تحدي لأيماني الشخصي بقدرتي النفسية والعقلية والجسدية اللي ربنا حطها فيني وبالتالي الله ما خلقني معاق بالعكس الله خلقني قادر على كسر اعاقتي
(لا تنسى انو الانسان مسيحيا وجودو على هالارض هو الحالة الاستثنائية ولأنو بعيد عن الله بيولد فيه هالنقصان الدائم الموجود بكل منا وان اتخذ اشكال شكلية وظاهرة اكثر بالبعض الآخر

الفكرة هي ببساطة انا لحالي معاق حتى لوكانت كل اطرافي سليمة وحتى لو كنت بتمتع بجزء من المنطق والذكاء والادراك الا انو انا معاق بشهواتي وغروري وكبريائي

وانت كمان معاق لربما بهدول او بغيرن

اذا بروح انا وانت لنشتغل مع معاق عقليا او جسديا لربما رح نشوف اكبر صدمة انو كتار منن والاغلب منن متحررين من كل ما يعيقنا ولهم من القدرات التي تجعلك تصرخ بكل تأكيد
تبارك الرب اله الكون الذي كشف سره للصغار وحجبه عن الكبار


ليش الرب خلقهن،مشان يعذب أهلن عغلط عملو من قبل؟
نفس السؤال انسأل ليسوع المسيح والجواب كان سهل جدا عندو

وان كان من اصعب الاجوبة اللي ممكن انا وانت نشوفها

لا ابوه ولا امه أخطئا وانما ليظهر مجد الله فيه
...
كيف ؟؟

يا اما فينا نحنا اللي منقدر نساعدو ليكتشف قدراتو اكتر او فيه هو اللي بيقدر يتحدى اعاقتو ويحقق نجاحات ايمانية اولا وعملية واجتماعية ثانيا


طب شو ذنبو هالمعاق؟أو بالأحرى شو هوي هالذنب اللي عملو الأهل ليتعذبو بهالطريقة؟إختبار

ما الذك لما تسأل سؤال وتجاوب عليه !!
هذا يعني انو سؤالك ما كان للمعرفة ولا للنقاش وانما لبيان الرأي الخاص بك وبالتالي عبثي ......

ومع هاد نعم بقلك بجزء منو اختبار ولكن ليس من الله لك
لا بل من العالم والظروف التي ادت الى هذا التحدي كما سبق واسميته سابقا
فهل ستدع هذا العالم يخضعك ؟ ام لا؟


شو هالاختبار؟ الرب بيختبر الإنسان بشي في يحملو مو بهيك شي!

مرة تانية اعطاء بيان رأي وليس سؤال.
ببساطة انت حكمت من عندك انو ما فيه يحملو وع الاغلب انت قارنت حالك فيه وقلت لو انا بدالو ما كنت قدرت اتحمل

والحقيقة( وكون الجزئية تتحدث عن المعاق من ولادته )
انك لا تستطيع ان تتخيل نفسك بدلا منه لأنه ببساطة لا يعلم ما هو الوضع المقابل !!!
واما في حالة المعاق نتيجة حادثة اي كأمر نتيجة مسبب
فهون رح تكتشف بشوية موضوعية انو اغلبن كمان حياتن بتستمر ايضا وايضا

ولربما جعلتن هالاعاقة يحبو الحياة اكتر

بس المشكلة انو رئيس هذا العالم الشرير قتال الناس بيضل ياخد افكارنا الى الجوانب السلبية وهي هي الاعاقة بحد ذاتها

طب ليش خلق للأنثى غشاء بكارة وما خلق واحد للذكر كمان؟؟وكأنو عميقول أنو الذكر في يعمل اللي بدو ياه أما الأنثى لا؟؟؟

همممممممممم لساتك عم تسأل وتقفز لنتائج ببساطة هاد تشريح طبيعي ولمعلوماتك هالتشريح يتطابق لدى كل الكائنات الثديية
فهل هذا يعني انو جوابك الشخصي ينطبق ايضا على الفئران والقطط ووووغيرها من الحيوانات!!!!!!!!

واما انو تحط هالنوع من الاسئلة كحجة على امر اخلاقي ضمن مجتمعاتنا الشرقية فالعفو الوصية كانت واضحة موجهة للانسان بصيغة المذكر لا تزن !!
والحقيقة انو موجهة لكل من الرجل والمرأة والمسيح رفع السقف للسماوات لما حرم علينا الشهوة الجنسية الخاطئة خارج اطر الزواج المقدس فدينيا وجود او عدم وجود هذا الغشاء ليس مهما بقدر التزامك بمضمون وصية الله لقد خلق الانسان ذكراوانثى
وارتضى الله ان يلزم الزوج زوجته فيصبحان جسدا واحدا
ويتناميا ليصبحا عائلة واحدة ليش جسدين في شهوات آنية لحظية مدنسة!!

ليش نزل إبليس من الجنة للأرض مع أنو هوي كان الملاك الوحيد اللي عمل صح بعدم
سجوده لآدم وحواء لأنو قال :"أنا من نار وهما من تراب، ولا أسجد إلا لخالقي"؟
اولا السبب اللي حطيتو لسقوط ابليس (ان صح التعبير بهذا الاسم )
ليس هو السبب مسيحيا وانما كان السب رغبته في اخذ مكان الله وتمرده على ارادته
وللمعلومات ايضا سقوط سقوط الشيطان تم قبل خلق الانسان

ليش صار إبليس شيطان بمثل قوة الشر بالكون يعني ليش الله بدال ما يقتلو أو يعذبو خلاه الشر بالعالم؟

ببساطة لأن لكل شيء وقت معين يناسبه عند الله(نعبر عنه بكلمة مهمة /ولما تم ملء الزمان/) وهذا الجواب يغض البصر عن مخالفتك المروعة لصلاح الله بكلمة ان الله يقتل !!

الا تعلم يا صديقي ان الشيطان بوجوده منغلقا ومنعزلاعن الكمال والمحبة الالهية يتعذب كل يوم اكثر بآلاف المرات من الموت !!!

طيب الإنسان مسير ولا مخيير بأفعالو؟كل الأديان أكدت انو مخيير بس كيف هالشي مادام
الرب بيعرف كلشي بما في المستقبل،بيعرف شو صار ،شو عما يصير،بس شو بدو يصير
(مابظن).

الانسان مخير بقراره وطريقه الذي سيسير فيه ولكن هذا لا يعني بان الله جاهل بما يحدث او جاهل بنتائج الامور

تخيل معي ببساطة انك تجلس بطوافة فوق مدينة كلاس انجلوس مليئة بالطرقات الرئيسية والدوارات والساحات والحارات والمداخل الصغيرة والدخاليش

شبكة طرق كاملة
ولنفرض انو انا قلتلك راقب فلان من الناس او سيارة فلان
وهو غريب عن هالمدينة بدو يفوت بشوارعها من الطرف الى المركز او الى الطرف الآخر
انت من محلك هاد بتقدر تشوف كل الاختيارات اللي عندو من سيارة خصوصي او تكسي او باص او مشي
وبتقدر تشوف وين بيقدر يفوت ويطلع كيف بيوصل باسرع طريق او اطول طريق او يلف بمكانو او يرجع مطرح ما اجى

الفكرة هي انو فيك تخبر اللي بيشتغلو معك ع الارض انو يعطوه اشارات بس اهم شي انو تعطيه حرية الاختيار المطلقة للطريق

اذا كان ممكن تتخيل هالشي عن حالك وعن رجل واحد

تخيل انو تكون عم تراقب 100 رجال بنفس المدينة ولكن لا كبرها عملها العالم

وزيد الزمان عليها
وحط الافكار والنفس

يا سلااام ع كمية الاحتمالات والقرارات اللي طلعت معك هلق

وهدول مية مو 6 مليار هلق !!

هيك ربنا بيعرف كلشي صار لأنو تقرر من الانسان وانتهت المسببات والنتائج
وبيعرف شو عم يصير
لأنو قررناه هلق
وضلت النتائج اللتي ستكون نتيجة للمسببات

وبيعرف شو رح يصير بناء على احتماليات قرارنا الشخصي جاه المواقف المركبة من ظروف جوية وطبيعية وكونية طبيعية وقرارات بشر وكائنات حية اخرى حرة او مستعبدة
سابقة وآنية وستحدث
ببساطة هو بيشوف المسببات وانت الك حرية اختيار ما ستريد فعله والنتيجة رح تختلف تباعا لهذا
وهو يعلم كل النتائج المحتملة ولكنه يحبك لدرجة انه لن يمنعك عن اتخاذ قرارك مع انه سينبهك بوسائل ان انتبهت اليها فستدهش من كثرتها وتنوعها

كيف بدو يحاسبنا عشغلات هوي كاتبلنا إياها بهالحالة صار الإنسان متل حر الشطرنج أو
متل برنامج كمبيوتر متل ما بتصممو بيعمل!

هون فكرة القدرية .... لازم تعرف انو مسيحيا لا يوجد قدرية وبعتقد شرحي فوق كان وافي وكافي لينفي عن مسيحيتنا اي ايمان بالقدرية

ليش الواحد بيخلق ع دين أبو هي نص مصيبة للمسيحي واليهودي بس للمسلم كارثة إذا حب
يغير دينو لأنو بيعتبرو مرتد فبيعطو مهلة 3 أيام بحاولو يغيرولو قرارو فيها وإذا ما قبل
عقوبة المرتد القتل!!!!!!!!!


هون بدك تفرق بين الدين كفكر وبين الشريعة للاسف اسلاميا هدول الاثنين كتيير مختلطين ومن الصعب فكن
وبجميع الاحوال بحياتو ما كان دين الاب هو المحدد لدين الابن الا اذا كان الابن اكسل من انو يشوف شو اللي بيناسبو

الفكرة انو بعرف كثار من الشبيبة اهلن مسيحين بالاسم وهن مسيحين بالاسم وبأمل انو ما يكونو ولادن متلن
وبعد كل هالشي وين العدل ياجماعة حدا يخبرني عنجد دويخة بتدوخ[/QUOTE]


العدل بيكمن

في انك حر لدرجة تكون هالفكرة الظالمة عن ربنا
وانك محبوب لدرجة انو مع كل نواقصك (كأنسان مو كشخص)

الرب تجسد كرمالك وفداك بدمو ع الصليب واقامك معو


العدل بيكمن في انو نور ربنا بيطلع بوجه طفل عم يضحك وختيار عم يضحك وامتعبانة بآخر نهارا تبتسم لأولادها وزوجها
وكاهن

يوقف ويقول تبادلو سلام المسيح

[بقايا انسان]

رد: هل الرب يستحق صفة العادل أم لا ؟

بحب قلك انو انا معاق وعايش حياة طبيعية 100% ومافي عندي عذاب ابداً فمن وين جبت ان المعاق معذب ؟؟؟؟؟؟

[sezeef]

رد: هل الرب يستحق صفة العادل أم لا ؟

[QUOTE=apolone;696679]ياترى هل الرب بيستاهل صفة العدل ولا لأ؟؟؟؟؟؟
سألت حالي كتير بس بدون فائدة:
ليش في ناس معاقين ليش الرب خلقهن،مشان يعذب أهلن عغلط عملو من قبل؟ طب شو ذنبو هالمعاق؟أو بالأحرى شو هوي هالذنب اللي عملو الأهل ليتعذبو بهالطريقة؟إختبار
شو هالاختبار؟ الرب بيختبر الإنسان بشي في يحملو مو بهيك شي!

صديقي طارح السؤال او التساؤلات يسعد اوقاتك.
رائع جدا ما طرحت وجميل ما فكرت فيه انه نفس الاحساس الذي انتابني في كثير من محطات حياتي انه نفس الشعور الذي تركني لزمن طويل في دوامة لا قرار لها .الى أن فتح الله عيني علي بعض الحقائق وسلط على قلبي نوره فبدد اشارات استفهامي واليك ان احببت انقل تجربتي بداي وبعبارة تقليدية رتيبة ومملة اقول من قال ان المعوق مذنب بل من قال ان الاعاقة ذنب ياصديقي قد لا تكون اختبرت فرح البساطة والحب والسعادة الحقيقية التي يحملها الشخص المعوق في فلبه والقادر ببساطة على نشره في محيطه بعفوية قادرة على اذهالك واذهال نحن معشر الاصحاء (ان كنا كذلك حقا)
وبعد من قال ان الله يرضى بان يحاسب شخص ما بذنب غيره ؟ دعني اسير واياك يا صديقي الى حيث يقبع كتاب حياتي وحياتك هناك وللاسف في ركن مهمل يغطيه الغبارفامسح بكم ثوبك عنه الغبار وافتح فيه صفحة نقفز فيها معا لنقف بين الجموع ونسمع شاب هناك في الوسط يتحدث الى الجموع .على غرة يساله احد المقربين اليه وفي عينيه حسرة بعد ان راى اعمى يساله عندها يارب من اخطا هو أم والديه حتى ولد اعمى ينظر الشاب اليه ببسمة فيها كل الرقة ويقول في لطف مشوب ببعض التعجب (لا هو أخطأ ولا والديه ولكن لتظهر قدرة الله فيه)قدرة الله الكامنة في كل مخلوقاته والتي عنها يوضح بولس الرسول في رسالته لاهل كورنثس(ان ما كان في العالم من ضعف فذلك ما اختاره الله ليخزي الاقوياء وما كان كان في العالم من جهل فذلك ما اراده الله ليخزي الحكماء)ان لكل منا يا عزيزي ضعفه ولدى كل منا من الوهن ما يجعله يعي ان لا غنى له عن الاخر ولا تكتمل حياته الا به ومعه ومن اجله . نصيحتي اليك ان تتعايش ولو لفترة قصيرة مع من وصفتهم جهلا او ظلما بالمعاقين وتامل في حياتهم لتدرك كم هم كبار وكم نحن (انا وانت )صغار هم كبار بفرحهم ونحن صغار بعقدنا و تعقيداتنا للحياة التي لا يمكن لنا ان ندرك عظمت جمالها الا بتامل بساطتها وعفويته عش معهم وتعلم منهم وافرح بطريقتهم لا بطريقتك واكتب بعدها ما شئت .

طب ليش خلق للأنثى غشاء بكارة وما خلق واحد للذكر كمان؟؟وكأنو عميقول أنو الذكر في يعمل اللي بدو ياه أما الأنثى لا؟؟؟

من الذي وشوش في اذنك يوما ان رموز انوثة الانثى هي مصادر قلق وضعف وخجل ودونية والتي انطلاقا منها (هذه المفاهيم)اعتبرت ان للرجل الحق في ان يفعل ما يشاء
طالما ان الله عفاه منها ان في المرأة ياعزيزي من شموخ الله ما يجعل تحني هامتك احتراما امامها كيف لا وقد اختارها الله لتكون جسرا لخلاص البشرية بابنها الفادي اليست امي وامك وكل الامهات في هذا العالم دليل لا يرتقي اليه الشك في ان الانثىى مصدر وجود العالم
وساعود اليك للرد على بقية التساؤلات فيما بعد
لك مني كل الحب

[shark]

رد: هل الرب يستحق صفة العادل أم لا ؟

Molham

[Ibrahem]

رد: هل الرب يستحق صفة العادل أم لا ؟

بحب قلك انو انا معاق وعايش حياة طبيعية 100% ومافي عندي عذاب ابداً فمن وين جبت ان المعاق معذب ؟؟؟؟؟؟

وأنا ستغربت عليا لهي الجملة
بعدين أنا بكره تعبير المعاق ما بحبا لهي الكلمة
وشكراً .......

[Attractive Girl]

رد: هل الرب يستحق صفة العادل أم لا ؟

اخ
Molham Haddad
عنجد كلامك كتير مقنع
يعطيك العافي

[ninos]

رد: هل الرب يستحق صفة العادل أم لا ؟

ياترى هل الرب بيستاهل صفة العدل ولا لأ؟؟؟؟؟؟

من انا لأقيم الله
سألت حالي كتير بس بدون فائدة:
ليش في ناس معاقين ليش الرب خلقهن،مشان يعذب أهلن عغلط عملو من قبل؟

ومين قالك انو هي طريقة من طرق الله في معاقبة الاهل
طب شو ذنبو هالمعاق؟أو بالأحرى شو هوي هالذنب اللي عملو الأهل ليتعذبو بهالطريقة؟إختبار
لا ذنب للمعاق و لا لأهله
و متل ما فال ملهم في ناس معاقين فكريا و حالتهن اسوأ من المعاقين جسديا
ليك حبيبنا انا عشت فترة قصيرة مع المعاقين جسديا بس عنجد اكتشفت فيهن اشياء حلوة
و هي محبتهن لكل العالم
و اخلاصهن و وصدقهن و ذكائهن يمكن الله بلاهن بالاعاقة بس اعطاهن قدرات بالذكاء و الابداع
و كمان الله اعطاهن البركات في السماء
شو هالاختبار؟ الرب بيختبر الإنسان بشي في يحملو مو بهيك شي!
طب ليش خلق للأنثى غشاء بكارة وما خلق واحد للذكر كمان؟؟وكأنو عميقول أنو الذكر في يعمل اللي بدو ياه أما الأنثى لا؟؟؟
ملهم كفى ووفى
ليش نزل إبليس من الجنة للأرض مع أنو هوي كان الملاك الوحيد اللي عمل صح بعدم
سجوده لآدم وحواء لأنو قال :"أنا من نار وهما من تراب، ولا أسجد إلا لخالقي"؟
هاد من منطلق اسلامي
لكن من منطلق توراتي و انجيلي
ابليس تعالى جدا و ساوى نفسه بالله و قال اجلس على كرسي الله
ليش صار إبليس شيطان بمثل قوة الشر(هو اختار بإرادته ) بالكون يعني ليش الله بدال ما يقتلو أو يعذبو خلاه الشر بالعالم؟
ليك في قول لأحد القديسين و بعتقد اسمو الشيخ الروحاني (يوحنا سابا ) : إن قال لك احدهم لماذا ترك الله الشيطان هنا ؟ اجبه بهذه العبارات
ان الشيطان لا يستطيع ان يؤذي المؤمن و بل يفيده ايضا , و ذلك ليس بإرادة الشيطان بل بقوة المؤمن


طيب الإنسان مسير ولا مخيير بأفعالو؟كل الأديان أكدت انو مخيير بس كيف هالشي مادام
الانسان في المسيحية مخير و إن كان مسير فليش الله بدو يحاسبو على اعمال هو مسير انو يعملها او هو مجبر انو يعملها

الرب بيعرف كلشي بما في المستقبل،بيعرف شو صار ،شو عما يصير،بس شو بدو يصير
(مابظن).
لكن شو من شان النبؤات التي نطق فيها الرب و تحققت من ايام آدم وحتى مجيء السيد المسيح
كيف بدو يحاسبنا عشغلات هوي كاتبلنا إياها بهالحالة صار الإنسان متل حر الشطرنج أو
متل برنامج كمبيوتر متل ما بتصممو بيعمل!

هاد الكلام منطق اسلامي اما في المسيحية فالإنسان مخير وهو بيحرك احجار الشطرنج متل ما بدو
ليش الواحد بيخلق ع دين أبو هي نص مصيبة للمسيحي واليهودي بس للمسلم كارثة إذا حب
يغير دينو لأنو بيعتبرو مرتد فبيعطو مهلة 3 أيام بحاولو يغيرولو قرارو فيها وإذا ما قبل
عقوبة المرتد القتل!!!!!!!!!

هون انا بحكي عن حرية المعتقد في المسيحية
حرية الاعتقاد مباح كما هو في حقوق الانسان

وبعد كل هالشي وين العدل ياجماعة حدا يخبرني عنجد دويخة بتدوخ

حبيب خود الامور ببساطة و من دون اي تعقيد

[apolone]

رد: هل الرب يستحق صفة العادل أم لا؟؟؟

أول شي شكرا Molham :
أنا ما قدت بالمعاقين الناس اللي ما عندهن إيد أو رجل بس أو اللي بيخلقو بدون بصر أو سمع لأانو الطب توصل لحلل لهي الإعاقات لكن قصدت اللي إعاقتهن ما إلها حل وبتحمل الألم للمعاق وللأهل ،في ناس بتخلق معها تشوه بأعضاء جسمها(ما عندها قدرة تاكل إلا بأجهزة معينة وما فيها تمشي وما فيها تحكي ولا تعمل أي شيء لأنو القدرة عالمحاكمة العقلية عندهن ضعيفة كتير بعرف شخص كانت عندو هي الإعاقات كلها ما بتتخيل الحزن يلي كان عند أمو ولا حرقة قلبها لما بتسمع صوتو عميتوجع لأنو مقومة جسمو كتير ضعيفة شافو أحسن الدكاترة بسوريا وبرا سوريا
لكن للأسف الكل أكد أنو هاد أمر واقع ما فينا نغيرو ولا نعالجو وهالطفل ما كان في يعمل شي طبيعي غير النوم) أما بالنسبة للإعاقات العقلية متل ما قلت انت أنا معك ما حدا بيعرف هدول و عميحسو وبأي مستوى سعادة هنن واصلينلو (لأنو جسمن سليم بس لخلل بعقلن.)
تاني شي قلت انو الرب خلق المعاق ( ليظهر مجد الله فيه)بصراحة ما فهمت عليك كتير لأنو لتظهر مجدك لازم تظهرو شي سليم بيحمل السعادة للناس.
تالتا:ما بظن اون انا أو غيري ممكن يتحمل يشوف ابنو أو اخو أو اختو......مريض وما في يعمل شي حياتك أكيد رح تستمر بس اللي ما فيك تحملو هوي حرقة القلب وانك تشوف ناس سليمين جسديا والتاني لا وبدون ذب وبتقلي في عدل كمان؟؟
بالنسبة لموضوع غشاء البكارة أنا حكيت عن الإنسان مو عن الحيوان وبظن أنو التنين بيختلفو كتير عن بعض لأنو بكتير مجتمعات يعتبر البكارة دليل عفة المرأة وكمان هالغشاء ما إلو نفع يعني وجوده وعدمو ما بيفرق ،بس المراة غذا غلطت رح يكون في ليل عالغلط طول حياتها أما الرجل فلا.وطبعا كلنا منسمع بحالات القتل والطلاق و و و بسبب هالغشاء مع انو الرجل بذات نفسه ممكن ما يكون بتول.مو قصدي بين الناحية السلبية بالمجتمع الشرقي بس لا قصدي أنو عطوني شي نفع لأنو يكون في دليل ع عذورة المراة وا يكون في واحد للرجل؟
أما بالنسبة لموضوع سقوط الشيطان والتخيير والتسيير فصار هون في اختلاف بالقصص والتشريعات الدينية بين مسيحية واسلام فماحنفوت بهالتفاصيل بالوقت الحاضر ومرة تانية شكرا عآرائلك الحلوة.

[apolone]

رد: هل الرب يستحق صفة العادل أم لا ؟

ومنشان sezeef بعتذر إذا انفهم قصدي غلط عن البكارة بأنو دليل (دونية أو خجل أو ضعف). بس القصد أنو بدل عغلط عملتو الأنثى بدون الذكر ومو انا اللي قلت انو الرجل في يعمل شو ما بدو نا قلت (كأنو)وشكرا

أما بالنسبة لninos فأنا بقيم الرب و من وجهة نظري وبطرح فرة لأتناقش فيها واني حط فرضيات وأسئلة عن الرب فهادا بصفتي إنسان (حقي الطبيعي) لحتى اتوصل للرب ما فيك تأثبت صحة شي إلا لتنفي العكس.
بس شباب بحب نوه على شغلة هيي أنو لما كنت عمإطرح سؤال وجاوب عنو ،فهاد مو جوابي أنا بس قصدي أنو ما حدا يجاوب بأنو ممكن يكون اختبار لأهلو أو تكفير عن ذنب ارتكبو إلخ إلخ
ومارح فيني رد عالباقي لأنو صار موضوع اختلاف بالأديان وهاد موضوع خارج عن موضوعنا الأساسيشكرا للكل

[Molham Haddad]

رد: هل الرب يستحق صفة العادل أم لا؟؟؟

أول شي شكرا Molham :
أنا ما قدت بالمعاقين الناس اللي ما عندهن إيد أو رجل بس أو اللي بيخلقو بدون بصر أو سمع لأانو الطب توصل لحلل لهي الإعاقات لكن قصدت اللي إعاقتهن ما إلها حل وبتحمل الألم للمعاق وللأهل ،في ناس بتخلق معها تشوه بأعضاء جسمها(ما عندها قدرة تاكل إلا بأجهزة معينة وما فيها تمشي وما فيها تحكي ولا تعمل أي شيء لأنو القدرة عالمحاكمة العقلية عندهن ضعيفة كتير بعرف شخص كانت عندو هي الإعاقات كلها ما بتتخيل الحزن يلي كان عند أمو ولا حرقة قلبها لما بتسمع صوتو عميتوجع لأنو مقومة جسمو كتير ضعيفة شافو أحسن الدكاترة بسوريا وبرا سوريا
لكن للأسف الكل أكد أنو هاد أمر واقع ما فينا نغيرو ولا نعالجو وهالطفل ما كان في يعمل شي طبيعي غير النوم) أما بالنسبة للإعاقات العقلية متل ما قلت انت أنا معك ما حدا بيعرف هدول و عميحسو وبأي مستوى سعادة هنن واصلينلو (لأنو جسمن سليم بس لخلل بعقلن.)
تاني شي قلت انو الرب خلق المعاق ( ليظهر مجد الله فيه)بصراحة ما فهمت عليك كتير لأنو لتظهر مجدك لازم تظهرو شي سليم بيحمل السعادة للناس.
تالتا:ما بظن اون انا أو غيري ممكن يتحمل يشوف ابنو أو اخو أو اختو......مريض وما في يعمل شي حياتك أكيد رح تستمر بس اللي ما فيك تحملو هوي حرقة القلب وانك تشوف ناس سليمين جسديا والتاني لا وبدون ذب وبتقلي في عدل كمان؟؟
بالنسبة لموضوع غشاء البكارة أنا حكيت عن الإنسان مو عن الحيوان وبظن أنو التنين بيختلفو كتير عن بعض لأنو بكتير مجتمعات يعتبر البكارة دليل عفة المرأة وكمان هالغشاء ما إلو نفع يعني وجوده وعدمو ما بيفرق ،بس المراة غذا غلطت رح يكون في ليل عالغلط طول حياتها أما الرجل فلا.وطبعا كلنا منسمع بحالات القتل والطلاق و و و بسبب هالغشاء مع انو الرجل بذات نفسه ممكن ما يكون بتول.مو قصدي بين الناحية السلبية بالمجتمع الشرقي بس لا قصدي أنو عطوني شي نفع لأنو يكون في دليل ع عذورة المراة وا يكون في واحد للرجل؟
أما بالنسبة لموضوع سقوط الشيطان والتخيير والتسيير فصار هون في اختلاف بالقصص والتشريعات الدينية بين مسيحية واسلام فماحنفوت بهالتفاصيل بالوقت الحاضر ومرة تانية شكرا عآرائلك الحلوة.

وانا حكيت عن كل المجروحين بجسدهم سواء بتر او تشوه طرفي او جهازي او عضوي او خلوي او وراثي الى جانب المجروحين بالنفس والمجروحين بالعقل

وكمان اللي صار معهم اشكالات نتيجة حوادث يعني بقصد الكل
واما قصدي بمجد الله وظهوره بكل مخلوقاته سليمة كانت او مشوهة او ناقصة

انو مجد الله يظهر بارادة الانسان ان يحيا بكمال بكل ما اوتي من قدرات

وليس في الشكل الجميل لأنو ربنا تفكيرو اعمق بآلاف المرات من تفكيرنا السطحي

ببساطة برأيك انو انسان مريض بمرض وراثي مو ممكن يكون وجودو سبب لترابط سرة اكثر
وحبه وتعلقه بان يكون فرحا بالرغم من المه اليس من الممكن ان يكون سببا لتمجيد الله في نظر من يعرفه ؟

هاد هو مجد الله في مخلوقاته بابسط صوره

واما سؤالك عن البكارة بظن اني وضحت انو سؤالك مو عن التشريح بل عن المجتمعات وهون ما الك حق تلوم الله على شكل تشريحي عام شئنا او ابينا عقليا واجتماعيا هو مشترك عند رتبة الثديات كلها من اصغرها لأضخمها

مبارح كانت امي عاملة كواج وانا اجيت من شغلي وقاعد عم آكل وانا بستعمل ايدي الشمال (اعسر)

المهم

ستي امرأة ختيارة عمرها 85 سنة

قاعدة جنبي وسألتني سؤال غريب
قالتلي فيك تمسك المعلقة وتحطها مليانة بتمك بادك اليمين ؟؟
قلتلها اي
قالتلي فرجيني شه شبها المرة يا جماعة !!
ساويت اللي طلبتو مسايرة
ولا بتقلي هه شفت ما اهيبك لما تاكل باليمين
كانت ردة فعلي مباشرة (انو شو انا بقرف لما آكل بالشمال ) جاوبتني لأ بس باليمين احسن........

بمنطق تفكيرك كان لازم اسأل ربنا ليش ما خلقت كل الناس بايديتن يمين
....انو شو تاركني ع كيفي آكل بالايد اللي عم تعجبني ؟؟؟؟

ما تقي بعدت هي تفس الفكرة

المجتمع الشرقي يكره انو الفتاة تفقد بكارتها قبل الزواج والمجتمع الغربي ولا سألان

ونفس الشي المجتمع القروي اللي جاية منو ستي بيكره العسراويين

واما اختلاف القصص بين الاديان اكيد ما رح فوت بالخلاف ولكن ما رح اسمح انو تتمرق
افكار دينية اخرى (الا لأخذ العلم فقط)

ضمن منتدى مسيحي وبعتقد هاد حق
والرب يباركك